Sma pakhang shnong ha ka 11 tarik rKut ka 48 kynta, ap ki jingiakhih ba shyrkhei

Shillong, 8 Jymmang:
Mynhynnin ka miet ka KSU ryngkat kiwei pat ki Sengbhalang kiba ia don ryngkat ryngkat ha ka por ka jingiakhih ILP ki la shim ia ka rai ban ai por 48 kynta ia ka sorkar jylla ba kan pyllait noh ia u President jong ka u samla Daniel Khyriem bad ban weng lut ia baroh ki mukotduma kiba la mudui pyrshah ia ki sengbhalang.
Ka la byrngem ba lada jia ba ka sorkar kam sngap ia katei ka jingdawa jong ki hapoh katei ka por ba la buh (48 kynta) kin pynlong da ka jingiakhih kaba tyngeh. Lah ban kdew ba haduh ba thoh ia kane ka khubor, ka por ba ki sengbhalang ki la buh ka la iaid sha ka 24 kynta tam, hynrei ym pat shym la iohi dak eiei ba ka sorkar kan leh na bynta kitei ki jingdawa bad ka 48 kynta kan kut lashai ka miet 9 tarik ha ka por 9 baje mynmiet.
Ki tyllong khubor kiba la iohlum ki la iathuh ba mynta ka sngi ka la don ka jingialang ki nongialam ba kham rangbah ka KSU ha ophis treikam jong katei ka seng kaba don ha Jaiaw, ha katei ka jingialang la ong ba la lum tang ia ki nongialam ka KSU ban ia kren sani bha halor ka jingshah kem u President jong katei ka seng. Hynrei hadien ba la wai ka jingialang kaba tang para nongialam KSU, ka la don sa kawei pat ka jingialang ha katei ka juh hi ka jaka ha kaba ka jingialang ka la long hapdeng ki nongialam jong kiwei pat ki Sengbhalang kum ka FKJGP, HNYF bad kiwei bad la don ryngkat ruh ki khraw pyrkhat kiba dei ki nongai buit aibor jong ki Sengbhalang. Shuh shuh ki tyllong khubor ki la iathuh ba katei ka jingialang jong ka KSU bad kiwei pat ki Seng bhalang ka long ban pynkhreh ia ki mat iakhih lada jia ba ka sorkar kam shah shkor ia ki jingdawa jong ki. La ong ba ki jingiakhih ki la pynap lypa bad kaba sah mynta ka long tang ban pynbna paidbah. Haduh mynta ki sengbhalang kim pat kwah ban pynbna ia kiba kumno ki rai iakhih ba ki la pynkhreh, hynrei la ioh jingtip ba ki jingiakhih kin long kiba shyrkhei bad kiba radbah ki ban pynkhih win ia ka nongbah Shillong. Katba ha iew ha hat ha lynti ha syngkien pat ki khubor hamsaia ki la saphriang ba kan don ka jingpakhang shnong ha ka lah sngi u Blei ka 11 tarik u jymmang, hynrei ka tyllong khubor na ki katto katne ki nongialam sengbhalang kim pat kwah ban ong eiei, hynrei ki la ong ba shen kin sa pynbna ia kaba donkam.