Lah ban kem shuh ki pulit, ia ki nongialam sengbhalang

Shillong, 8 Jymmang: 
Ki pulit ki lah ban kem shuh shuh ia ki nongialam sengbhalang kiba don bynta ha ka jingiakhih ILP mynshem snem namar ba ka sorkar lyngba ka Special Court ka la pynngat mukotduma (case) ia ki hapoh ka ain Meghalaya Maintenance of Public Order (MMPO).
Ha kane ka sngi Palei u president rangbah ka KSU u Bah Daniel Khyriem u la shah kem halor ka jingpynngat mukotduma ha ka kam pynjulor ha ka por ba pynlong ia ka jingiakhih ban dawa ia ka ILP ha kane ka jylla.U Bah Khyriem u la shah kem hadien ba u la kyntait ban shim jamin ia ka jinghukum ka Kashari ban kem ia u bad la set 14 sngi ha phatok.
Na ka liang u SP ka East Khasi hills u Bah M Kharkrang u la ong ba ki pulit kin sa kem shuh shuh ia ki nongialam sengbhalang kiba la bthah da ka Kashari bad yn sa shim kam katkum ka hukum ka Kashari.
Katkum ka jingong u Bah Kharkrang, ka Kashari ka la phah ia ka shithi ban kem ia  ki nongialam sengbhalang bad ki don haduh 87  tylli ki jingpynngat katkum ki kyndon hapoh ka ain Meghalaya Maintenance of Public Order (MMPO) Act  halor ka jingiakhih ILP.U Bah Kharkrang u la ong ba kine ki mukotduma ki iadei bad ka jingkawang maw, thang kali, pyniap, bad kiwei ki kam beain kiba jia ha ka por ba pynlong ia ka jingiakhih ILP ha u snem 2013 bad 2014. “Na baroh kiba la rejister, 82 tylli la dep pynngat bad aiti ha ka Kashari”, la ong u Bah Kharkrang bad kumba 80 ngut ki dkhot ki sengbhalang ki la shah kem bad la pynlait noh hadien ba la ioh jamin. U Bah Kharkrang u la iathuh ba ki pulit ki ai ia ka kaiphod sha ka Kashari halor ka jingpynshitom ia kiba donkti. U Bah Kharkrang u la ong ba ka jingjia myn hynnin kam dei ka sien ba nyngkong ba ki pulit ban phah shithi khot hajir hynrei la dep phah naduh kham mynshwa sha baroh ki nongialam sengbhalang. Watla phah hynrei ki nongialam sengbhalang ne kiba haiing jongki kim shym pdiang. U Bah Kharkrang u la iathuh ba tang hadien ka jingkyntait jongki, ba ki pulit ki la iathuh sha ka Kashari, kaba pynmih ia ka hukum ban kem ia ki.
Ha kawei ka liang, ki pulit ki la pynjur ia ka jingpahara ha kylleng ka nongbah bad kiwei ki district hadien ba la shah kem u President ka KSU. “La pynjur ia ki bor pahara nalor kiba la don lypa ban khang lad ia ka jingthmu jong ki runar ban pynthut ia ka suk ka sain”, la ong u Bah Kharkrang. Tang ha Shillong, ki don shibun ki jaka ba la pynjur pahara, la ong u Bah Kharkrang.