Bynniaw U ma Thombor, bym pdiang ia ka Bill ki Rangbah shnong

Jowai, 8 Jymmang:
Ka Executive Com mmittee hapoh ka jing ialam u ma Thombor Shiwat ka la pynpaw ia ka jingbynniaw halor ka jingbym shym la pdiang ka sorkar jylla lyngba ka tnad District Council Affairs halor ka Bill kaba iadei bad ki Rangbah shnong, ki Dolloi; kaba ka iing dorbar ha kane ka Dorbar Mang Tyngka ka la dep ban ai ia ka jing mynjur jong ka.
“Ngi khmih lynti ban ioh ia ka jingmynjur jong u lat halor katei ka bill khnang ba ki Rangbah Shnong bad ki nong synshar Elaka kin ioh ban treikam katkum katei ka ain, hynrei ngi sngewsih ba ka sorkar kam shym la pathiaw ia katei ka bill”, la ong u CEM ka JHADC u ma Thombor Shiwat.
Utei u nongialam ka JHADC, u la ong ruh ba kane ka dei ka buit jong ka sorkar jylla ban ioh knieh ia ka hok jong ki District Council ban thaw ia ka ain na ka bynta ki Dolloi bad ki Rangbah shnong. Ka sorkar imat ka don ka jingmut ban knieh ia ka hok ba la bynshet ha ki Autonomous District Council (ADC).
Utei u nongialam u la ong ba katkum ka Sixth Scheduled, ki ADC ki don ka bor ban thaw ain na ka bynta ki Rangbah shnong namar ki hap hapoh ka jingpeit ki District Council, hynrei ka Sorkar jylla pat ka pyrshang ban knieh ia kane ka hok jong ki ADC.
Utei u nongialam ka JHADC, u la kyntu ia ka sorkar jylla ba kan bishar ia ki kynrum ki kynram ha kaba iadei bad ki Rangbah shnong bad ban phah noh ia katei ka Bill sha u Lat ka jylla ban ioh ia ka jingmynjut khnang ba kan long ain na ka bynta ki bor shnong bad bor Elaka.