T.86 lak, ka skhim surok ha Sawmer shiteng

Shillong, 8 Jymmang:
U myntri ka tnad PWD u ma Sniawbhalang Dhar mynta ka sngi u la leit jngoh ia ka sawmer shiteng na ka bynta ban pynbna ia ka skhim surok shnong ha katei ka shnong. La synran ia u myntri da u MLA ka Mylliem u bah R.V lyngdoh, ki ophisar/enjiniar ka tnad PWD bad la don lang ruh na ka liang ka dorbar shnong. U myntri ka tnad PWD u la pynbna ba ka sorkar ka la mang pisa kyrpang T.86 lak tyngka na bynta katei ka surok kaba jngai 0.370 kilomitar bad u la ong ba ia katei ka surok yn sa shna noh shen. U myntri u la ai ka jingkhublei kyrpang ia ki trai jaka kiba la ai sngewbha ia ka jaka jong ki na ka bynta ban myntoi lang u paidbah nongshong shnong lyngba katei ka surok. U bah RV Lyngdoh, MLA u la ong ba ka thong ba ha khmat eh ka sorkar ban wanrah ia ka roi ka par ka dei ban pynbiang ia ki surok ban pynsuk ia ka leit ka wan ki paidbah, u la ong ruh ba katei ka surok kan long ka jingmyntoi kaba khraw ia ki paidbah nongshong shnong jong katei ka shnong bad na ka liang jong u kum u MLA u la pynpaw ka jingkhublei kyrpang ia ki trai jaka kiba ai sngewbha ia ka jaka jong ki ban shna surok.