Ka ktang suloi ki pulit, kan ym lah ban wan rah jingsuk ha ka imlang sahlang, ong ka JSU

Ka seng JSU ka dap da ka jingsngewlyngngoh bad sngewphylla halor ka jingshah pyniap u Rangbah Cheristerfield Thangkhiew bad ka seng kam lah ban pdiang iaka rukom leh bor ki pulit ban shu siat iap beit ia u Bah Cheristerfield Thangkhiew mynne ka step haka ing sah jong u.Ka seng ka lah ong ruh haka jingshisha lah dei ban shu rah bad sa tohkit shuwa ia u halor kino kino ki kam kiba ki pulit ki suba ia u ba u donkti ha kino kino ki kam pyntriem bad ka seng kam lah khlem da pynrem jur ia ka tnat pulit jong ka jylla namar ka jingleh ka jong ki ka long pyrshah iaka hok longbriew namar tang hapoh ka shi khyllip mat ki shim noh iaka jingim u ne u rangbah u ba dang iohthiah lyngai ha lajong ka ing ryngkat bad ki khun ki kti jong u.

Ka seng ka kwah ruh ban pynsngew ba ki pulit kim dei ban nioñ da ka bor ban shu pyndonkam da ki ktang suloi, hynrei ki lah dei ban rah ban tohkit shuwa namar ka jingpyndonkam da ka tiar kan ym lah ban wan rah iaka suk saiñ hapoh ka imlang ka sahlang bad ka jingshah siat iap jong une rangbah ha khmat jong ki khun ki kti ka ktah shisha iaka ing ka sem baroh kawei.

Ka seng ka phah ruh ka kyrwoh sngewlem sha ka ing ka sem jong u bah Cheristerfield Thangkiew ba u Blei nongbuh nongthaw un don lang ryngkat bad ka ing ha kum kane ka por ba u lyoh ba dum u wan kah ha ka ing ka sem.