U President KSU, u shait u khlain

Shillong, 8 Jymmang:
U President Rang bah ka KSU, u samla Daniel Khyriem mynta u dang don hapoh District Jail ha nongbah Shillong bad u don hapdeng ka met kaba shait ba khlain ha kaba ki nongialam jong ka KSU mynta ka sngi ki la leit jngoh ia utei u nongialam jong ki hapoh katei ka phatok heh.
Katkum ka jingia thuh ki nongialam jong katei ka seng ki la ong ba u don hapdeng ka met kaba shait bakhlain bad kam shym la don kano kano ka jingud kaba mih na u, hynrei la pyrkhing pat ia ka rukom rung rukom mih bad ym shym la shah ban ia rung bun ngut ban leit peit ia u, la shah tang ar ne lai-ngut.
Katba ha kawei pat ka khubor, ka Seng Kur Khyriem Na I Nam Marbilon Khyriem ka la dawa na ka sorkar jylla ba ka dei ban pyllait noh mardor ia u samla Daniel, President KSU u ba dei ruh u Chief Organiser jong katei ka Seng Kur . Ka kyrwoh na katei ka Kur ka la pynpaw ia ka jingsngew sarong ba ka ioh ia u nongkitkam uba lah ban sah ha byndi na ka dawbah jong ka ri bad ka Jaitbynriew, ka la ai khublei ruh ia ki sengbhalang kiba la ieng rangbah ban kyrshan bad ban pynpaw paidbah ia ka jingdawa jong ki ban pyllait noh marmar ia utei u samla khlem da teh kyndoh.