Ka jing pynbor ia ki nongshong khappud

Ka Meghalaya bad ka Assam, ka don ha kine ki sngi, ha ka jing ia sdang ban ia pynbeit pud, hynrei la iohi, ba ka la sdang pynban, sa ka jing ia pynbor ia ki nongshong khappud, ba kin leit iasoh sha kawei na kitei ki jylla, ha kaba ka Meghalaya ruh, ka kwah ba ki shnong, kin wan phai sha ka bad nangta sa ka Assam ruh, ka don ia kajuh ka jing pynbor ia kitei ki nongshong khappud.

Ha ki khyndiat taiew ba ladep, ngi iohi, ia ki jingjia ha Iongkhuli, nangta ngi iohi sa kaba jia ha Pillingkata, ha Umlaper, ha kaba ka Assam, ka thaw ia ki lad ban pynbor ia ki nongshong khappud, ba kin rung sha katei ka jylla.

Ka jing pynrung ne pynmih shnong, ha kine ki sngi, kam mih shuh; hynrei kaba kongsan, ka dei ban long ka jing sngew ieid, ka jing sngew tynnad bad ka jing ia sngew thuh jingmut hapdeng kitei ki shnong khappud, wat lada ki dei ban don sha Assam lane sha Meghalaya, namar ba kine ki ar jylla, kim dei satia kum ka jing ia knieh pud hapdeng ka India bad ka Pakistan ne ka China.

Ki ar tylli ki jylla, ki dei ban wan rah ia ka mynsiem jong ka jingsngew trai ia ki jaka puta, kaba mut ba ki trai jaka, kiba dei ki khasi lane ki Assamese, ki dei ban sngew trai ia la ki jong ki shnong ki thaw (tangba ym dei ia ki khar Bangladesh ne ki khar Nepali) bad hadien ba ki la sngew trai, kin sa shim hi ia ka rai, kaba ki sngew iahap bha, la ki kwah ban don sha Assam ne sha Meghalaya.
Tangba katei ka rai ruh, ka dei ban nym khanglad ia ka jinglong trai jongki, ia ki jaka puta, ia ka ktien ka thylliej, ka niam ka rukom bad ka jinglong kyrpang jongki, bad lada ki ar jylla, ki ai ia katei ka lad, kumta ki nongshong khappud, kin ioh ia ka jingieid bad ka jingsngew laitluid jong ki, khlem da sngew wit satia, lada ki dei ban hap ha ka jylli synshar jong ka Assam ne ka Meghalaya.

Namar ba katei ka mat, ia pynbeit pud, ka lah ban long kaba stet ne kaba slem, hynrei, kaba kongsan eh, ka long ba ki ar jylla, ki dei ban pynbiang ia la ki jong ki pulit kiba pahara ha shi lynter u pud, ba kan nym don ka jingshim kabu ne pyntieng da ki seng lehnoh, da ki sengbhalang, da ki kynhun kulmar shnong lane wat na ki pulit jong ka jylla ba marjan bad haba ka long kumta, ka wan rah ia ka jing shngain jong ki nongshong khappud na baroh arliang.