“Wat khmih lynti ba ngan mynjur ia ka hukum, haduh ka jingiap ruh” rPhla U bah Adelbert ba u kob ia U SR Sen ha kashari

Shillong, 6 Jymmang:
“Wat khmih lynti ba ngan mynjur ia ka hukum jong phi, wat haduh ka sngi ka jingiap jong nga” phla u CEM ka KHADC ba u kob ia u nongbishar ka high Court u SR Sen ha ka por ba u shah tian bishar ha ing kashari. “Ngan iai iakhun bad iai iakhun, katba nga dang sah mynsiem” ong biang u bah Nongrum haba kren ha ka jingialang paidbah ba la khot da ka seng HSPDP mynta ka sngi ha Madan Student.
Shuh shuh u bah Adelbert u la ong ba katei ka jingjia ba la mih ka jingshah sloit bor ki Rangbah shnong ka dei na kawei ka jingjia kaba la jia ha Jaintia hills, hynrei ki arliang mamla hangtei ki la ia suk, pynban la pynmih ia ka rai ha ka 10 tarik u nohprah kaba long salonsar ia baroh. “Kaei ka jingmyntoi u SR Sen, ka dei ba ka don eiei sha lyndet, bad ka dei tang ban ioh sloit bad pynlyngkhuit ia ka ri bad ka Jaitbynriew” u la bynrap biang.
U CEM la ong ba ia mynta ym ka Village Admnistration Bill kaba kyrkieh, lymne u pud u sam lymne ka ioh kam ioh jam ki khun samla hynrei kaba kyrkieh eh ka dei ka jingiatylli bad u la pynpaw ba u kwah ba ka ARPA kan ia tylli mlon hapoh District Council khnang ban ih ban iakhun ia kiba bun bah ki mat kiba iadei bad ka Jaitbynriew. “Ka riti Dustur ka dei ka ain, bad ia ka ain la shna na ka riti ka dustur” u la ong biang haba kren ia ka kam ki Rangbah Shnong.
Ha kaba iadei bad katei ka mat, u bah Adelbert u la ong ba dang mynhynnin ka sngi u la wan ia kynduh ia ka sorkar, ban ia kren ia ka kam ba dei bad ki Rangbah Shnong. Haba kren ba kum u nongialam hapoh District Council bad kum u briew uba ieit ia ka Jaitbynriew un ia khun beit haduh ba kut haduh ba katei ka hukum kan pyllait luid ia ka Jaitbynriew u la ong, “Ngan ym thok ia ka Jaitbynriew, lada nga thok ia i mei bad ka lok jong nga, nga la thok ia ka Jaitbynriew” ong u CEM ka KHADC.
Shuwa ban pynkut ia ka jingkren u bah Adelbert u la ong ba un iaid beit shakhmat ia kaei kaba la pynbna kata ban shah thngan ha ban da iap haduh ba ka sorkar kan lah ban leh eiei halor ka kam ba iadei bad ki Rangbah Shnong bad u la ai por 10 sng ia ka sorkar, bad lada ka lah un sdang ia ka jingshah thngan marwei.