Ka shnong Jowai, ka iit khmih ka Jaintia, ka la shah iehbein, ong ka SKRSRJ

Jowai:Ka Synjuk ki Rangbah shnong Ri Jaintia, myn hynnin ka sngi ka la khot jingialang na ka bynta ban iakren halor ka jingeh kiba mih na ka daw ka jingbym ioh jaka shuh ka Jowai Municipal Board ban leit bret ia ki niut na ka nongbah Jowai hadien ka jingpyrshah na ka KSU bad ki 6 shnong ban bteng ia ka jingbret ia ki niut na Jowai sha Mynkjai.

U Adviser ka Synjuk ki Rangbah Shnong ka ri Jaintia, u ma S Langi u la ong ba hadien ba ki la iohi ia ki kynrum kynram ba la mih na ka jingbymioh jaka shnong ban bret ia ki niut na ka nongbah Jowai kaba dei ka nongbah ka rilum West Jaintia HIlls, ki la shong ia ka jingialang ba kyrkieh myn hynnin ka sngi.

Ha kane ka jingialang na ka liang ka Synjuk ki Rangbah Shnong Ri Jaintia ka la dawa jur na ka Sorkar ba kadei ban pynioh jaka kaba biang na ka bynta ban bret niut bad kumjuh ruh ka la kyntu ia ki 6 shnong ba long kiba iaishah.
“Ki Niut ki Nier bad ki jaboh jabain ki long kiba ktah ia ka koit ka khiah ki paidbah bad ka lah ban long kaba kham bha ban ia ka Covid -19, kumta ngi dei ban wad ia ki lad ki lynti ban wanrah ka khuid ka suba da ka lynti jong ka jingiatreilang bad ym ban wanrah ia ka jingiasngewpher hapdeng kawei ka shnong bad kawei pat lane hapdeng kawei ka thain bad kawei pat” la ong u ma S Langi.

U President ka Synjuk ki Rangbah Shnong Ri Jaintia, u Armyius Lypon u la ong ba kum ka Synjuk jong ki Rangbah Shnong, ngim kwah ban iohi ia ka jingsnewpher namar kito ki shnong kiba la pyrshah ia ka jingwan bret ia ki niut ki don la ka hok bad ki paidbah ka sor Jowai ruh ki don la ka hok ban pyrshah, hynrei dei ka kamram jong ka sorkar bad ka bor District ban weng ia kine ki jingeh da kaba wad ia ka jaka kaba biang eh ban ia kaba don ha Mynkjai.
“Ka Shnong Jowai ka la shah ieh bein, ka dei ka it khmih ka ri lum Jaintia, hynrei ka la shah iehbein ha bun ki liang”, la ong utei u nongialam ka Synjuk.

“Baroh ar liang ki shah ktah na ki Niut bad ngi kum ka Synjuk ki Rangbah Shnong Ri Jaintia ngi ban jur ia ka sorkar ban weng noh kloi kloi ia kane ka jingeh na ka bynta ka khuid ka suba bad ka koit ka khiah jong ki paidbah”, u la bynrap.