Kulmar thlim ki ophisar, ia ka rai ka High Court

Shillong, 5 Jymmang:   
Bun bah ki ophisar sorkar Meghalaya ki la kulmar jingmut thlim ia ka rai jong ka Meghalaya High Court ban nym pdiang shuh ia ki syrnod na ki Rangbah Shnong.
Kane ka la paw ba kam shym la don kano kano ka jingbthah na ka sorkar sha ki tnad sorkar ban sangeh ka pan syrnod na ki rangbah shnong haba donkam kano kano kaba iadei bad ka kam sorkar.
Ha ka hukum, u Justice SR Sen u la bthah ia ka sorkar Meghalaya ba kam dei ban pan jingiarap na ki rangbah shnong khamtam ban ai syrnod ia kano kano ka kam namar ba ki rangbah shnong kim dei ba la ithuh da ka bor jong ka ain.
Hynrei, kumba ka paw ka sorkar Meghalaya ka la leh sting ia kane ka hukum ka Kashari ha kaba ka khlem pynmih kano kano ka jingpynbna sha ki tnad sorkar bapher bapher ia kane ka hukum ka Kashari lait noh tang ia u Commissioners & secretaries ka tnad kam pohiing, ka District Council Affairs (DCA) bad ia u Deputy commissioner jong ki district.
U secretary ka tnad kam ain ka jylla u LM Sangma um shym la tip balei ka sorkar kam shym la pynmih ia ka jingpynbna sha ki tnad sorkar halor kane ka rai jong ka High Court.
U Sangma u la kam ba um shym la ioh kano kano ka hukum ban phah jingthoh sha ki tnad sorkar bad u la kynnoh ia ki nongthoh khubor ba ki leh kum ki ophisar ba tohkit bad kane la long ha ka jingleit iakynduh jongki ban iakren halor kane ka rai jong ka Kashari hynne ka sngi Hatmajai. Hynrei hadien ba la kylli ki nongthoh khubor, u la bthah ia ki nongtrei ban wanrah ia ka jingpynbna ba la sam sha ka tnad DCA, tnad kam pohiing bad sha ki DC.
Haba ki nongthoh khubor ki la buh jingkylli balei khlem phah ia ka jingpynban sha kiwei ki tnad sorkar baroh, u Sangma u la ong “Ka jingbym tip ia ka ain, kam dei ka kam ban map bad ka rai jong ka Kashari High Court ka dei ka ain”.
Kane ka jingleh ka sorkar ka la long kumba khein sting ia ka kam bad ka la buh jingeh ia ki paidbah bad ki rangbah shnong bad sah ha ka umdum bad ka buh jingeh ruh ia ki tnad sorkar kiba donkam ia ka jingiatreilang bad ki bor shnong haba pyndonkam ia kano kano ka skhim pynroi.