Shah pyn budnam, ka tnat ka kit ka bah

Ka sorkar MDA, kam pat kren eiei haduh mynta, halor ki jingshah kynnoh pyn budnam jong ka tnat ka kit ka bah ka sorkar jylla bad kitei ki kynthup, halor ka jingmih ki jingkieng thew kali beain, kumba la kynnoh, da u myntri ka tnat shna surok bad pyniaid kali jong ka sorkar India, ha Parliament, nangta sa ka jing pynkiew dor beain ia ka jingshna number kali bad nangta sa kajuh hi ka tnat, kaba la bat da u juh u myntri, ka tnat Industries, kaba dei halor ka jingmih ki karkhana Coke sha East Jaintia hills.

Kat kitei ki jingshah pyn budnam, kiba la poi shaduh sha Parliament, ha kaba la sei madan, da u myntri jong ka sorkar India, U Nitin Gadkari, kam dei satia ka sobjek kaba rit bad kaba lah ban shu ia tap eit miaw kumto.

Ym tang katta, wan sa ka jingtah number plate, kaba la sdang nyngkong eh ha Meghalaya bad kaba la pynbieit ia ki paidbah, ba kitei ki number plate HSRP, kin dei ki number, ki ban nym shah tuh shuh ki kali, lane lada shah tuh ruh, ba yn lap da kaba suk bad ba la khein da ka dor kaba rem tam, ha ka Ri India hi baroh kawei bad kaba la pynlong ia ka CBI, ba kan shimti ia ka jing tohkit, halor katei ka kam tuh, kaba la shyrkhei rem, na ka pla jong u paidlang ka jylla hi baroh kawei.

Mynta ka wan, sa ka jing jyllei ki karkhana Coke sha Jaintia hills, ha kaba u myntri kam poh iing, ula phah khang noh, ha ki bor pulit bad ngim tip, la ka jingphah khang, ka dei kaba da ka ktien ne da ka jingthoh, lane la ka dei ia ki pulit, ban phah khang, lane ia ka tnat karkhana (Industries), ba kan leh ia la ka jong ka kamram.

Ka sorkar MDA, lyngba u myntri rangbah, ka la dei ban kren bad pyni ia ka jingmut jongka, kaba shai, khamtam halor ka jingdon ki jingkieng thew beain, kumba la kynnoh da u myntri ka sorkar India ha Parliament.

U myntri rangbah, ula dei ban shim ia ka rai kaba shlur bad kaba shai, wat lada dei ban weng noh, ia u myntri ba mynta jong ka tnat ka kit ka bah, U Ma Sniawbhalang Dhar, haba ka jylla Meghalaya, ka la shah thad ha ka Ri baroh kawei; namar ba lada ia U James Sangma, uba shah budnam ha ka jinglum pisa na ki trok bad na ka jing bamsap, ha MeECL, la dawa ban pynhap, kumta katno tam, ia katei lei ka tnat, kaba la shah thad ha khmat ka Parliament.