Ban ker sainar shiah, dei ka kamram ka sorkar jylla ban pynioh jaka

Shillong, 28 Iaiong:
Ka kamram ka sorkar pdeng ka dei ban ker sainar shiah ha baroh shi lynter ka khappud ha jylla bad ka kamram ka sorkar jylla ka dei ban pynioh ia ki jaka.
Katkum ka khubor ba la iohlum, la iathuh ba ka sorkar pdeng ka la bthah ia ka sorkar jylla ba ka dei ban pyndep kloi ia ka shim jaka kiba hap ban ker sainar shiah. “Ka sorkar pdeng kan pyndep noh ia ka jingker sainar shiah ha khappud mar ia dep ai jaka ka sorkar jylla”, la ong ka khubor ba la iohlum.
Dang shen, u myntri khynnah tnad kam pohiing ka ri, u Kiren Rijiju u la wan jngoh ia ka thain khappud bad u la iuh kjat haduh Dawki ban peit bad bishar ia ka jingiaid ka kam ker sainar shiah ha khappud ka Meghalaya bad ka Bangladesh. Namar ka jingpyrshah ki trai jaka, ka jingthmu ban ker sainar shiah ha ki katto katne ki bynta ka Khasi, ki dang sah teng haduh mynta.
Ki trai jaka ki la dawa ba ka sorkar ka dei ban ker sainar naduh u zero line namar ba lada ker 150 yard shapoh na u zero line, kin duh lut ia ki bri ki bsah bad kin ioh ei ka Bangladesh.
Katkum ka jingtip, ka jingbym lah ban ker sainar naduh zero line ka dei namar ba ka don ka  jingiateh mynshwa ha ka por ba long myntri rangbahduh ka Indira Gandhi bad u Majibur ka Bangladesh. Kane ka jingiateh, ka la pynbuh jingeh ia ka sorkar BJP kaba don ha ka bor ban ker naduh zero line.