Ap ka jingiakhih kaba jur, paidbah long ba la khreh: FKJGP

Shillong, 28 Iaiong:
Ka Federation of Khasi, Jaintia and Garo People ( FKJGP) lyngba ka kyrwoh khubor ba la pyllait paidbah mynta ka sngi da u Information and Publicity Secretary u bah Eldie N Lyngdoh u la ong ba ka FKJGP kan ym ailad da lei lei ruh ia ka sorkar pdeng ne ka sorkar jylla ba kan tih Uranium ha kane ka ri lyngba ka UCIL.
Katei ka seng ka la ong ba wat hapdeng ka jingpyrshah kaba jur na ki Sengbhalang pynban ka sorkar pdeng ka la sdang ban lushia biang ban ioh tih Uranium ha kane ka jylla. Ka la ong ruh ba ka sorkar ka la sdang mynta da ki buit sianti ban pynbiej ia u paidbah da ki kam pynroi bad ki lad jingiarap kiba bun tang ban ioh tih ia utei u mar pohkhyndew. Ha kajuh ka por ka kyrwoh ka la byrngem ba kan ym ailad horkit hordang ia ka sorkar ban tih Uranium ha kane ka jylla bad lada ka ialeh pyrshah kan ia khih da kaba tyngeh. “Paidbah long kiba la khreh, lada ka sorkar ka ialeh pyrshah, ka jingiakhih kaba jur ka la ap lypa” pynkut ka kyrwoh na ka FKJGP.