Khyrwit U Mukul Sangma ia ka Sorkar NDA, kaba leh politiks ia ka ILP

Shillong:Hadien ba la iohi ia ka jingbitar jong ki khun samla ka jylla da kaba ki la thoh la pruid ha ki kynroh ha kylleng sawdong ban dawa shai na ka Sorkar Pdeng ba ka dei ban pyntreikam noh mardor ia ka Inner Line Permit(ILP) ha ka jylla, na ka liang jong u nongialam u ba shong sha ka liang pyrshah hapoh ka ïing dorbar thawaiñ, u Dr Mukul Sangma u la ong ba ka Sorkar National Democratic Alliance (NDA) kaba la lam khmat da ka seng Bharatiya Janata Party(BJP) ha Sorkar Pdeng kam dei satia ba kan ialeh politiks ia ka mat Inner Line Permit(ILP) kaba long ka mat kaba ktah mationg ia ki paidbah ka jylla.

U Dr Mukul Sangma u la ong ruh ba ka Sorkar India kam dei ban ialeh politiks than ia ka jylla ka jong ngi kaba long ka jylla kaba rit bha kaba don tang 2 ngut ki MP.

Shuh shuh u la ong ruh ba ka Sorkar India ka la ai ILP ia ka jylla Manipur bad ia kiwei kiwei ruh ki jylla hynrei kaba lyngngoh ka long balei pat kam lah ban pyntreikam beit noh ia ka ILP ha ka jylla Meghalaya. U Dr Mukul u la khyrwit tyngeh ruh ia u Myntri Rangbah ka Jylla, u Conrad K Sangma u bym shym lah leh eiei halor kane, wat la ka dei ka mat kaba la mynjur lang da ka ïingdorbar thawaiñ jong ka jylla.