Hadien ka 15tarik, lah ban plie noh ia ki jaka pule, ong u myntri

Shillong:U myntri ka tnad pule puthi jong ka sorkar jylla u bah Lahkmen Rymbui, u la ong ba lada ka tnad ka koit ka khia ka la ai jingmynjur lang lah ban plie noh ia ki jaka pule hadien ka 15 tarik mynta u bnai.

Haba ia kren bad ki lad pathai khubor, u bah Rymbui u la ong ba lada ia ki iew ki hat bad kiwei kiwei ki jingtrei kam la lah ban plie balei ym lah ban plie ia ki jaka pule, kumta lada ai jingmynjur na ka tnad ka koit ka khiah, yn sa shim rai noh ban plie ia ki jaka pule hadien ka Independent day.

U la ong ruh ba kat kum ka jinglum jingkheiñ jong ka tnad palat ia ka 50% ki khynnah pule kiba la 18 snem shaneng, ki la dep ban ai Vaccine ia lade bad ka la dei ruh ka por ban sdang noh ia ka jingai jinghikai hapoh ki jaka pule, namar ba ka online class kam lah ban ai jinghikai pule pura ia ki khynnah.

Na ka liang u myntri u la ong ruh ba kumba ka long mynta kumba 50% ki briew ha ka jylla ki la dep ban ai vaccine bad ka long ka ba sngewtynnad ban tip ba man ka sngi kumba 10,000 ngut ki briew ki wan ban ai vaccine.
Hynrei wat katta ruh ka jylla kam pat shngain, bad kan dang donkam ban wan sha khmat shuh shuh ban ai vaccine “ki briew ki nang tang ban ud halor ki jingeh kiba mih na ka daw jong ka khlam, hynrei haba ioh ia la lad ka lynti ban iada ki artatien”u la ong.
Na ka liang u myntri u la kyntu ia ki nongshong shnong ba kin wan sha khmat ban ai vaccine khnang ban lah iada ia lade bad kumjuh ia kiwei.