Bym pynjlan thungkam, kynnoh ba leh shiliang ka sorkar

Shillong, 28 Iaiong:
Ar tylli ki sengbha lang na ri Lum Jaintia ka Jaintia student Union bad ka Jaintia Youth Federation ki la kynnoh ba ka sorkar ka la leh shiliang ha ka rukom pynjlan thungkam ia ki samla kiba la pass na ka District Selection Committee ha kylleng ki district ka jylla. Kitei ki sengbhalang ki la phah da ka jingthoh sha u Chief Secretary ka jylla u bah PBO Warjri ba un tuklar halor ka jingbym pdiang ka sorkar ban pynjlan ia ka por thung kam ia ki samla kiba la pass na bynta ka kam Forest Guard bad Demonstrator ha Jaintia Hills.
“Ia ka jingkyrpad ban pynjlan thungkam ia ki kyrteng ba la pynmih ka DSC na Jaintia hill ym shym la pdiang, katba na ka West Khasi Hills pat la pynjlan sa hynriew bnai da u Under Secretary sha ka sorkar jylla , Personnel $ AR ( B) Department bad ia kane la leh ym tang shisien ne arsien hynrei na ka por sha ka por” ong u President ka JYF bad JSU u bah Pynpoihun Majaw bad u bah Rikut N Parien ha ka jingthoh kaba la ai sha u CS. Katkum ka jingkren kitei ki ar ngut ki nongialam ki la ong ba ha West Khasi Hills la pynjlan thungkam na bynta ka kam LDA/Sectional Assistant/Gram Sevak/Tracer.
Kitei ki ar seng ki la kynnoh ba katei ka ingleh jong ka sorkar ka dei ka jingleh shilliang khmat, ha kaba ki la iathuh ba ka sorkar ka la pyntip sha kito ki samla kiba dep pass na DSC ba ka por thungkam ia ki ka la kut bad ym lah ban dang pynjlan shuh. Lah ban kdew ba ka DSC Jaintia Hills ka la dep ban pynbna ia ka resol ki samla kiba la pass ha ka kam na bynta ka kam Forest Guard bad ka kam Demonstrator (KTC).