Khliehriat: Na ka liang ka seng KSU Jalaphet Unit, Elaka Sutnga, ka ai ka jingkyrshan ba pura ia ka Environmental Coordination Committee (ECC) Elaka Sutnga halor ka jingdawa jong ka, na ki bor ba dei peit ban khangtala noh ia kine ki Hard Coke Factory kiba don hapoh ka Elaka Sutnga namar ki la mih la kum ki tit ha kane ka thaiñ bad la shna ruh ia ka hapoh ki Area ba shong basah ki briew, kaba la ktah shisha ia ka koit ka khiah jong ki briew kum juh ka la pynjaboh haduh katta katta ia ka lyer khuid ba ngi ring mynsiem bad ka pynjot ruh ia ka mei mariang kaba khuid ba suba.
Ka jingshna ia kine ki Hard Coke Factory ruh ka la long shaba palat namar la shna ia ka 5 haduh 6 tylli tang ha kawei ka shnong kaba ym lah shuh tang ban ring mynsiem khamtam ia ki pli ki khynnah ki khunlung kiba dang tlot ka met ka phad bad lada ym khang noh ia ki kloi kloi kan buh jingma ia ka jingim briew haduh katta katta khamtam ia kiba im sha kane ka thain.
Ka seng ka ai jingiaroh ruh ia u MLA ka Sutnga Saipung Constistuency shri Shitlang Pale uba la kloi ban iadonlang bad kyrshan ia kane ka jingdawa ka ECC Elaka Sutnga da kaba u la ia leit synranlang ia ki paidbah ka Elaka Sutnga ban leit tur sha ka Office u DC East Jaintia Hills ban dawa weng noh ia kine ki factory beain mardor.
Ka Seng ka pynpaw iaka jingsngewlyngngoh iaka jingioh lad kitei ki Coke Factory ban mih kum ki tit ha ka por lyiur hapoh ka Elaka. Ha kine ki por ba lah dep ka Assembly Committe ka lah dep wan jngoh ia kine ki Hard Coke Factory beain baroh, hynrei haduh mynta aiu ka lah leh halor kine factory, hynrei la iohi ba ym mih soh mih sla eiei ruh, na kata ka jingleit jurip ka Assembly Committe ia kitei ki Coke Factory.
Ka seng ka buh jingkylli ruh ia ka sorkar jylla ba kumno kine ki Hard Coke Factory ki ioh laitluid ban mih la kum ki tit tang hapoh katto katne por. Ka seng kan iai bud dien ban dawa na ka sorkar jylla ban weng noh mardor ia kine ki Hard coke factory beain hapoh ka elaka kumjuh na kane ka district, pynkut ka kyrwoh na u Samla Emmon Chyrmang President KSU Jalaphet Unit.
Phi don ban ong eiei?