Shah thombor ka shnong Maitdein ha ka shnong Borato rPom ia ki diengsoh, pynjot pung dohkha & tuh ki sniang ki syiar

Jowai, 27 Iaiong:
Ka huri hura hap deng ka shnong Borato bad ka shnong Maitdein ka la kem ding kyndit mynta ka sngi ha kaba palat 300 ngut eiei ki ki riew paidbah shynrang na ka shnong Borato ha ryngkat ki wait ki suloi ki la wan hiar sha shnong Maitdein ban pynjot naphang ia ki bri soh, ki diengkseh bad pynjot ruh ia ka pung dohkha nalor ba la rong ei ia ki sniang ki syiar bad ia u shyiap ba la lum na wah Myntang.
U Rangbah shnong ka shnong Maitdein, u ma Darphi Sariang, u la iathuh ba ha kine ki 3- 4 sngi, ka shnong Borato ka la maham lypa ban wan thombor ia ka shnong Maitdein ha kaba la ujor sha ki pulit ka ha ka 25 tarik bad tang hapoh ar sngi, katta mynta ka sngi 27 tarik ki la wan da palat 25 tylli ki kali kiba kynthup ia ki trok bad kali rit ha ryngkat ka kynhun kaba palat 300 ngut kiba la kieng atiar bha da ki wait bad ki suloi ki la wan ban thombor ia ka shnong Maitdein. Utei u rangbah shnong u la iathuh ba katei ka kynhun na ka shnong Borato ki la pom ia ki dieng ki siej kiba kynthup ia ki dieng kait, ki diengsoh niamtra bad wat ia diengkseh. Ki la pynjot ia kawei ka pung dohkha kaba dei trai da u ka Ri Sariang bad kit ruh ia u shyiap ba la lumthup bad ia kitei ki dieng kseh. “Ki la kem ruh ia ki sniang ki syiar jong ki paidbah bad ki paidbah jong ngi ki don mynta ha ka jingsyier”, la ong u ma Sariang.
Utei u rangbah shnong u la iathuh ba ki dieng sohniamtra kiba dei trai u ma Prin Saiang bad ka kong Sosmi Sariang haduh 1300 tynrai kiba jrong 8 phut ki la shah jynrat lut bad pom dusmon lut.
“Ka shnong Maitdein jong ngi ka don haduh 300 tylli ki rympei iing bad ngi don mynta ha ka jingsyier naba ka kynhun na ka shnong Borato ki lah ban wan hiar thma biang ia ngi”, la ong u Rangbah shnong.
 Na ka liang ki pulit ka West Jaintia Hills kiba kynthup ia u Additional Superindent of Police, u ma Chemphang Syrti ha ryngkat u Magistrate ki la hiar kyrkieh sha katei ka shnong ban lap ia kane ka jingjia kaba shisha.
Hynrei kat haduh ba kin da poi ha katei ka jaka, ki paidbah na ka shnong Borato ki la dep ban pynjot lut plain ia ka shnong Maitdein.