Lah ki shamoit ne lah ki dulir khyndew?

Shibun ki MLA, MDC ki seng bhalang, ki la ia hiar wut shi wut sha Iongkhuli, hynrei haduh mynta, la iohi, ba u myntri rangbah, uba ju smat ban her sha rum shaneng, um shym leit iuhkjat sha katei ka shnong rit, u myntri bor ding, uba la shah pyn khyllem ki nar ilektrik jongu, kim shym la leit bad u myntri kam poh iing, uba la shah kynnoh, ba ki pulit jongu, ki dei kiba shong thap nadien jong ki paidbah, um pat shym la poi sha katei ka jaka.

Kam lei lei ia kata, hynrei ka mat, kaba kwah iakren, ka long, ba ki don ki MLA, MDC, kiba leit sha katei ka jaka bad kiba tyrwa ba ka sorkar jylla, kan thaw dulir noh ia kitei ki nongshong khappud, khlem da donkam ba kin siew pisa.
Ngim tip, ia kaei ka jingmut, kaba don ha katei ka jingkren jong kitei ki rangbah, namar ba lehse, ia ka khyndew jong ka Iongkhuli, ki lah da dep thaw dulir ha U Syiem ka Raid Marwet lane ha U Syiem Mylliem, lada jia ba kim pat leit sha ka ophis jong ka Deputy Commissioner, Nongpoh.

Hynrei lada jia ba katei ka jing donkam dulir, ka kongsan bha, ka la dei ka por ia ki MLA jong katei ka thain, lada dei ka Jirang, ka Mawhati lane kito ki MLA, kiba leit sngewlem, ba kin pyn donkam noh ia ka T.2.5 klur ka MLA skhim jongki shisnem ban ai pisa ia ki briew, ba kin thaw dulir bad ka sorkar Jylla bad katei lehse, kan kham sngew shngain ia kiba don jaka ha katei ka shnong rit, ban ia kaba ki MLA, ki ju ai jing iarap iba thohmut thohmut, kum ki pela sha, ki shamoit, ki shatri bad kiwei ki jingiarap, ki bym don jing myntoi eiei ruh em.

Kumba ka long ia mynta, ka MLA skhim, ka dei ka skhim maphot kaba jubor tam, ha kaba ha u snem ba ladep, ka sorkar, ka ai bor ba kin ia thied khaw, thied dai ki MLA, haduh T.25lak bad sa mynta u snem ruh, la ailad ba kin pyn donkam hi ia katei ka pisa bad mynta lei, ym shym la buhdor eiei ruh em bad haba ka long ka skhim, ka bym don kyndon eiei ruh em bad kaba lah ban thied doh, thied pylleng, thied dud; ka la dei ia kito ki MLA, kiba sngewthuh ban ai dulir long trai khyndew, ba kin mang ia ka pisa jongki, ban pynioh ia ka dulir kaba neh sha kitei ki nongshong khappud bad kam iahap satia ban shu leit iam khlem jaw ummat, kum ki kuratia, sha kitei ki nongshong khappud jong ka Iongkhuli.