5000 tynrai yn thung syntiew Japan ka jylla ha wah Umiam

Shillong, 27 Iaiong:
Ka sorkar pdeng ka la jied ia ka jylla Megha laya na ka bynta ban thung ia u syntiew Japan ne uba khot u Cherry Blossom. Une u syntiew uba don ka bor ban khring ia ka jingitynnad u dei uba la kynrei bha ha ri Japan, China bad ha South Korea.
Kane ka jingthmu ka long ban pynkhreh namar ba ka jylla kan pdiang ia ka jingpynlong ia ka tamasa ia une u syntiew .
“Ka sorkar pdeng ka la rai ban sdang thung ia une u syntiew ha kane ka jylla namar ba ka iahap bha ka jinglong ka suin bneng” la ong u Director ka Institute of Bio-resources and Sustainable Development (IBSD)  u Prof Dinabandhu Sahoo ha ki nongthoh khubor hynne ka sngi ha nongbah Shillong.
Ia une u syntiew yn thung ha ki bynta ka wah Umiam kham hadien bad yn thung shwa ha nongbah Shillong bad ha kaba nyngkong yn thung shwa 5 hajar tynrai. ”Ka jingthmu ka long ban pdiang ia ka jingpynlong ia ka tamasa ia une u syntiew ha India ha ki bnai ban wan”, la ong u Prof Sahoo bad bynrap ba ka tamasa ka iahap bha bad syriem kum ka Sakura ha  Japan kaba ju pynlong man u snem hapdeng u Lber bad u Jymmang.
U Prof Sahoo u la iathuh ba ia kane ka kam la kyrshan da ka IBSD bad la mang haba kaba nyngkong T.10 lak. Ia ka pisa yn sa pynlait noh shen mar ia dep ka tnad khlaw ka jylla ban aiti ia ka jingthmu ban pynlut ia kane ka kam.  ”Ngi khmih lynti ba ka jylla kan pdiang ban pynlong ia ka tamasa ia une u syntiew ha u bnai Naiwieng ban wan”, u la ong u Prof Sahoo.