Lashai ka jingialang pyrshah SDO ha Sohra& Shella

Shillong, 27 Iaiong:
Ka Joint Action Committee ( JAC) ka thain Sohra ka la pynbna ba kan don ka jingialang paidbah ha ka 29 tarik u iaiong, kaba dei ruh ka sngi iew bah Sohra ka ban long ha madan Ing Dorbar Saitsohpen ha ka por 11 baje mynstep, bad katei ka jingialang ka long ban ia kren ia ka jingiaibteng jong u SDO ( Civil) Sohra Sub-Division ban pyn rung kyrteng thep vote ia ki bar jylla ha ka thup thep vote, kab ala wanrah ka jingbym hun ia u paidbah ka thain Sohra bad Shella, ong ka kyrwoh na u bah M.Bynnud, chairman bad u bah B.Mylliemngap secretary ka JAC. Ka JAC ka la khot la wer ia ki paidbah, ki rangbah shnong , ki sordar, ki samla kynthei bad shynrang ka thain Shella bad Sohra ban wan sha katei ka jngialang, ong ka kyrwoh.
Katba ki tyllong khubor ba la ioh lum la ong ba ha katei ka jingialang la khot ruh ia baroh ki MLA bad MDC jong ka Shella bad Sohra konstitwensi, ba kin wan lang sha katei ka jingialang. Katei ka jingialang la ong ba kan dei ka jingialang kaba ki paidbah ka thain Sohra kin shim ia ka rai rangbah da aiu kin leh bad da kano ka lynti kin pyni ia ka jingpyrshah jong ki ia u SDO( Civil) ka Sohra u Ganshyam Das, namar ka jingkynnoh ba u SDO u la khot pynrung kyrteng thep vote ia ki bar jylla kiba don ha katei ka thain , ha ophis treikam jong u.
Kham ha shuwa ia kane ka tyllong khubor ki la iathuh ba ka la don ka jingialang kaba la khot da ki sengbhalang ha ka sngi thohdieng jong ka taiew ba la dep, ha kaba la donlang ki khlieh nongsynshar ka thain Sohra bad Shella, ki ar tylli ki sengbhalang FKJGP bad KSU bad kumjuh ruh ka Synjuk ki Seng Samla Shnong jong ka thain Sohra, bad ha katei ka jingialang la thaw ia ka Joint Action Committee bad la shim ruh ia ka rai ban khot jingialang paidbah ha ka 29 tarik u iaiong, 2015 , iathuh ki lad khubor.
Lah ban kdew ba kham ha shuwa ia kane ki sengbhalang, ki seng samla shnong jong ka thain Sohra ki la tur sha Sohra Civil Sub-division ban pyrshah ia ka jingkhot pynrung kyrteng thep vote u SDO ia ki bar jylla bad ki la lap ruh ba da ki spah ngut ki bar jylla ki ieng lain ha katei ka ophis ban ioh pynrung kyrteng ialade bad ki la beh noh ia ki na katei ka jaka. Katkum ka jingkwah ki sengbhalang ka long ba ia ka jingpynrung kyrteng thep vote dei ban leit sha manla ki shnong khnang ba ki nongsynshar shnong kin ioh ban pynshisha ia ki briew kiba dei hok ban rung kyrteng.