Hadien ba u niah traktor, sa ka baisikil, niah U Rahul mynta ka sngi sha Parliament

Khyndiat sngi mynshwa, U Rahul Gandhi, ula niah da ka traktor sha Parliament, mynta ka sngi pat, ula niah da ka saikil.

Katei ka jingiaid da ka saikil, ka dei hadien ba ki liang pyrshah, ki la ia kynduh mynta ka step ban shim ia ki rai ban pyneh triang, ia ka sorkar BJP halor ka jingsngap tuh telephone Pegasus, ka jingdawa ban weng ia ka ain ki nongrep bad nangta halor ka jing bym ler ka sorkar, ban iakhun pyrshah ia ka khlam covid 19.

Mar ia wai ka jingialang, ki nongialam liang pyrshah, ba kynthup ia U Rahul Gandhi lem bad shibun kiwei ki MP, ki ia mih ban leit sha Parliament, da ki saikil jongki.

“Ka jingthmu jong kane ka jing ia kynduh, ka long ba ngin ia tylli kawei. Kumta katba ngi nang ia tylli, kan nang wan ka sur kaba khlain bha pyrshah ia ka jingleh thombor ka BJP bad ka RSS” ong U Rahul Gandhi.

Halor ka jingkiew dor ka petrol, diesel, U Rahul Gandhi, ula ong “Halor ka dor jong ka petrol, diesel, ka la ktah jubor ia u paidlang ka Ri bad lada ngi leit da ki saikil nangne sha Parliament, kan don ka jingmut kaba khia bha”.