Yn sei kaiphod kam pynroi ka Congress ha Meghalaya, ong U Narayanaswamy

Shillong 26 Iaiong:  
U General secretary ka AICC ba peit ia ka Meghalaya u V Naraya nas wamy u la ong ba ka sorkar MUA  ba ialam ka Congress kan sa sei ia ka kaiphod jingjop ia ki kam pynroi ba la leh ha kane ka jylla ha kine ki ar snem ba la dep.
“Nga la ong ia u myntri rangbah bad u president  ka MPCC u Bah DD Lapang  ba pynkhreh ia ka kaiphod jingjop jong ka sorkar ha kine ki ar snem ba la dep”, la ong u Narayananswamy.
U la ong ba ka kaiphod jingjop jong ka sorkar dei ban ai sha ki paidbah lyngba ki nong trei ka party.
“Ka jingthmu ka long ban hikai bad ban pyntip ia ki paidbah ba kin tip ia ki kam ba ka sorkar ka la leh ha kine ki ar snem ba la dep” la ong u general secretary ka AICC. U Narayanaswamy  u la ong ba ka Coordination Committee kaba la khlieh da ma u, ka la iapyrkhat ia ki jingtrei jong ka sorkar ha ka jingpyntreikam katkum ki mat jingkular elekshon jong ka party.
“Hadien ba la bishar bniah, nga la sngew kmen ia ka jingjop jong ka sorkar Congress ha kane ka jylla.  Hynrei, nga la bthah ba kin pyndep ia ki jingkular katkum ka por ba la buh” , u la ong.