Ka Labour, ka tnat kaba donkam tam ia ki nongbylla, ong U Bah Sanbor

Shillong:U myntri ka tnad Labour u bah Sanbor Shullai, u la ong ba kum u myntri thymmai jong kane ka tnad, un sa bishar bha halor ka skim ka ba iadei bad ka jingai jingiarap ia ki nongtrei bylla bad ban pynthikna ruh ba baroh ki nongbylla ki ba dei hok ban ioh jingiarap ki dei ban ioh ia kane ka pisa.

Na ka liang u bah Shullai u la ai khublei ia u myntri rangbah ka jylla u Conrad K Sangma u ba la bynshet ki tnad trei kam ia u bad u la ong ruh “Naduh ka sngi nyngkong ngan sa shong bishar bha ia baroh ki tnad bad khamtam ia ka tnad Labour, kaba dei ka tnad ba donkam tam namar ka dei na ka bynta ki nongbylla”.

“Ngan sa khot ia ki ophisar ha ka sngi nyngkong bad ngan sa bishar bha halor kane ka skim khnang ban lah ban pyllait noh ia ka pisa ia kito ki nongbylla ki ba dei hok ban ioh ia kane ka pisa”la ong u bah Sanbor ia ki lad pathai khubor.
U la ong ruh ba kum u myntri ka tnad labour, un sa bishar bniah halor ki jingdawa jong ka kong Rngad bad haba ki nong bylla ki donhok kin sa ioh ia kane ka pisa.

Na ka liang u bah Sanbor u la pynpaw ia ka jingsngewhun ia ki tnad kiba u myntri rangbah u la aiti ha u.
U la ong “Nga hun ia baroh ki tnad kiba na ka liang u myntri rangbah u la aiti ia nga namar ba haba ngi trei ngin trei na ka bynta ki paidbah”.