Kerkut ki longkmie ia ka jaka thew kali ha Byndihati rRat ka trok ia ka maruti car, khlad u samla hashen

Jowai, 24 Iaiong: 
Ka kynhun ki longkmie- kiba da ki spah ngut, kynthup ia ka Seng Longkmie Byndihati bad na ki shnong ba marjan ki la mih paidbah khrui mynta ka sngi ban kerkut ia ka jaka thew dewiong- ka Weighbridge kaba don ha Byndihati kaba pyniaid da ka tnad Transport jong ka sorkar jylla katkum ka jingbthah jong ka National Green Tribunal dang shen.
Kitei ki longkmie ha ryngkat ki khynah skul kiba la wan da ka bos ki la khang khyrdep ia katei ka jingkieng thew kali bad pakhang ia u surok katto katne kynta.
Ki heh District kynthup ia u Deputy Commissioner bad ki heh pulit ki la hiar kyrkhieh sha katei ka jaka ha ryngkat ki pyrton pulit bad ki kali pynlip ding kum ka jingpynkhreh ban tem lada mih kano kano ka jinghuria hura.
Hynrei da ka jingiarap ki rangbah shnong na Byndihati bad ki shnong ba marjan, ka bor District ka la lah ban pynthynda ia ki longkmie paidbhur.
Kane ka jingkerkut ia katei ka Weighbridge ka la jia hadien ka jingshah rat kawei ka kali maruti car (ML04B-5066) bad kawei ka trok dewiong (AS01CE-3057). Ha kane ka jingjia tyngkhuh kali, uwei u samla pule B.Com u la khlad noh hashen katba kawei pat ka samla pule XII ka la shitom jur.
La iathuh ba kitei ki ar ngut ki samla pule kiba na ka juh ka shnong ki la wan Class na Khliehriat bad ha ka por kumba 1:00 pm, ki la leit phai sha shnong da ka kali jong utei u samla ba pule B.Com ia uba la tip kyrteng kum u Franky Lyngdoh u khun jong u ma Maising Shylla.
La iathuh ba katba ki dang wan na Khliehriat, ka la don ka jingsahkut kali naduh Deinchynrum haduh ha Byndihati bad la kynnoh ba dei na ka daw jong katei ka Weighbridge. Namar ka jingsahkut kali, utei u samla Franky u la ieng hadien kawei ka trok kit dewiong. Kyndit kawei pat ka trok ka la tynrah ia katei ka kali rit na dien bad shyrbat ia ka ha kawei pat ka trok kaba ieng ha khmat haduh ba ka la songlut ha kaba u ba niah u la iap hashen katba katei ka samla pat ka la mynsaw jur. Ka Seng Longkmie bad ki longkmie kiba la ker kut ia katei ka Weighbridge ki la kynnoh ba ka daw jong kane ka jingjia aksiden kadei na katei ka jaka thew dewiong kumta ki la wan ban kerkut noh ia ka. Shuh shuh kitei ki seng longkmie ki la kynnoh ruh ba katei ka Weighbridge ka la bat-ain palat ha kaba wat lada tam u dewiong tang 200 Kg lane 300 Kg na ka 9 ton, kim shah shuh ia ki trok ban iaid.
“Katba ka Weighbridge ha Umling pat ki pyllait hi wat lada tam 200 lane 300 Kg, katba kane kam shym la pyllait satia”, la kynnoh shuh shuh kitei ki longkmie.