Yn wan sa u myntri jngoh kai pyrthei la shem taiew

Shillong, 24 Iaiong:
Hadien ka jingwan iuh kjat u President Rang bah  ka BJP u Amit Shah nalor kiwei pat ki Myntri Sorkar pdeng ha kine ki sngi ba ladep mynta yn wan sa u Myntri ka tnad kam jngoh kai pyrthei u Dr. Mahesh Sharma ha kane ka taiew ban wan tangba ia ka sngi ym shym pat lah ban pynti kna.
Katkum ka tyllong khubor ba la iohlum, la iathuh ba u Myntri ka kam jngoh kai pyrthei ka ri u Dr. Mahesh Sharma ha kane ka taiew ban wan un wan ban jngoh ia kane ka jylla Meghalaya.
La ong ba ka jingwan jong une u Myntri ka long ban wan ban twad jingmut ia ki skhim bapher bapher kiba ka sorkar pdeng ka la bei pisa ia kane ka jylla ban kyntiew ia kam jngoh kai pyrthei bad ia ka rukom pyntreikam ia ki skhim.La sngewthuuh ba ha kane ka jingwan iuh kjat jong u, un iakynduh ia ki ophisar ki heh sorkar kane ka jylla ban ia phylliew jingmut na bynta ban pyntreikam ia ki skhim ha kane ka jylla ha kaba ka sorkar pdeng ka la pynkhreh.Ka tyllong khubor ka la iathuh ba kane ka jingwan jngoh ki Myntri sorkar pdeng khah khah ia kane ka jylla, ka long ban pyntikna ba ki skhim kiba la mang na bynta u paidbah kidei ban poi beit khlem ka jingiaid kynriang kumba la mang da ka sorkar.Ha kawei ka liang, ka long ruh ban wanrah ia ka jingiasngew jan jong ki paidbah ia ki heh sorkar namar ba ka jingangnud jong u Myntri Rangbahduh ka ri u Narendra Modi ka long ba ki kam pynroi ki dei ban poi sha ki jaka kiba la thmu ym ban pynsahteng khnang ban wanrah ia ka roi ka par kaba sted.
Naduh ba wan ka BJP ha ka sorkar pdeng, u Myntri Rangbahduh ka ri u Modi u la bthah ba baroh ki Myntri na ki tnad bapher bapher kidei ban pynlong ia ka jingleit jurip la kumno kumno arngut ki Myntri ha ka shi bnai kidei ban leit jurip sha man ki jylla ha kane ka thain dong Mihngi ka ri India na ka bynta ban lum jingtip ia ki jingpyntreikam ia ki skhim pynroi bapher bapher jong ka sorkar pdeng.Hynrei ha kawei ka khubor, la iathuh ba ka jingwan jurip ki Myntri sorkar na Delhi ka la pynsuhjer ruh ia ka sorkar jylla kaba la ialam da ka sorkar Congress namar ba kam lah shuh ban trei katba mon ia ki skhim kiba ka sorkar pdeng ka la bei khlem da iaid katkum ka kyndon.