Hikai leh khuid ha Sohmynting

Shillong, 24iaiong:
Ka Youth & Cultural Sports Club, Soh mynting ryngkat ka jingiatrei lang bad ka Sohmynting Village Water & Sanitation Committee (VWSC) ka la pynlong ia ka Prokram halor ka jingkhuid ka Suba mynta ka sngi ha Community Hall, Sohmynting ia kaba la iarap pisa na ka ophis jong U Deputy Commissioner West Jaintia Hills District, Jowai.
La wan ban ai jinghikai ha kane ka sngi da u Ma Kerlang Lyngdoh uba dei u Block Co-ordinator jong ka Swacch Bharat Mission ha kaba la wan ban ia shim bynta da ki spah ngut ki nongshong shnong jong ka shnong Sohmynting lem bad ki nongialam jong ka Youth Club, VWSC bad ki dkhot committee jong ka Dorbar shnong. U Ma Kerlang u la batai bniah shaphang ka jingthmu jong kane ka prokram da kaba ong ba kane long kaba biang eh khamtam sha ki thain nongkyndong namar bunsien ki longing ki mad ia ka jingpang jingshitom tang na ki daw ba ka jingbym nang ban sumar bad lehkhuid ia lade shimet bad ia ka sawdong sawkun.
Shuh shuh u ong ba lada ki longing ki kwah ban ioh ia ka jingkoit jingkhiah ki dei ban don ia ka painkhana kaba bha ha man la ki thliew ing, namar lada ngi leit painkhana pathar sha ki rud ki kiar ne sha lum sha wah ka wan rah ia ka lyer bad ka um kaba jakhlia bad lada ngi dih bad ring mynsiem ia k,i ki lah ban pynioh pang ia ngi naduh ka prie ka pynhiar bad kiwei kiwei ki jait jingpang. U Ma Kerlang  u la hikai bad kyntu ruh ia ki nongshong shnong ba ki dei ban iatrei lang bad ka Youth Club lem bad ka VWSC khnang ba ka shnong ka thaw bad ka imlang ka sahlang kan long kaba khuid ba suba.  Ha kane ka sngi la pyniaid ia kane ka jingialang da u Ma M.Lyngdoh Pyrtuh uba dei u Rangbah Shnong barim jong ka Shnong Sohmynting bad la ioh ruh ia ka jingkren lamphang na U Simon Pyrtuh Rangbah Shnong bad ka jingkren ai khublei na U Ma B. Phawa General Secretary Shnong.