Ka seng ki Daju Iewduh

Shillong, 24 Iaiong:
Mynta ka sngi la pynskhem ia ka seng ki nongkitnong ha Iewduh ne ki Daju kaba la tip kum ka ‘Hynniewtrep nongkit nong Association’ ha ka jingialang kaba la long ha Khasi National Dorbar Hall, Mawkhaw. Ha katei ka jingialang la poi kumba 400 ngut tam ki Daju kiba kitnong ha Iewduh.
La pyntian smai ia ki nongkitkam katei ka seng da ki nongialam ka Hynniewtrep Youth Council ( HYC) Central Body u Vice President katei ka seng u samla Donbok Kharlyngdoh, u samla Nickson Dohling bad u samla Danny Rynjah. Ia ka kam President jong ka HNA la bat da u bah B.Jyrwa katba ia ka kam General Secretary pat la bat da u bah Edwin Mangu. Ha katei ka jingialang la donlang ruh ka nongialam ka seng Domestic Worker Union kaba la ai jingkren.
Haba ia kren bad Rupang u President ka HNA u bah B.Jyrwa u la ong ba ki don haduh kumba 400 ngut tam ki Daju kiba kitnong ha Iewduh kiba la pynrung dkhot ialade hapoh katei ka seng, bad u la ong ba suki suki katei ka seng kaba ka ktem bah jong ka ka dei ha Iewduh ka don ka jingthmu ban pyniar ia ka shnat treikam jong ka da kaba seng ia ki Unit ha kylleng ki iew ki hat ka ri Khasi –Jaintia kum ha Iew Umsning, Mairang bad sha kiwei ki jaka , hynrei haduh mynta kim pat shym la ia kren eiei ha kano ka iew kin thaw ia ka unit ba nyngkong jong ki. U la iathuh ba ha katei ka jingialang la sneng la kraw ia baroh ki nongkitnong ha Iewduh, da ki nongialam katei ka seng kynthup ki nongialam ka HYC bad DWU ba kin tip ban ri ia ka akor ka burom, ka ktien ka thylliej, bad ban trei hok ha ki kam jong ki.
Haba la kylli hato ka don ne-em ka jingiakren halor ka mat pynphong Uniform kaba ki Daju ki la ia khih teng khyndiat bnai mynshuwa, u bah Jyrwa u la ong ba kam shym la don shuh ka jingiakren ia ka kam Uniform, namarba ki Daju ki la kyntait bad ba ki la ia railing ruh bad ka KHADC ba kin iaid la ka jong ka lynti bad ba ka KHADC kan ym tuklar eiei ruh em . Haba la kylli biang hato napdeng kitei ki 400 ngut ki dkhot don ne-em kiba la dep shim Uniform na ophis ka hima Mylliem, u bah Jyrwa u la ong “Ki don kumba 7 ne 8 ngut kiba la dep siew pisa bad ki la shim ia ka uniform, hynrei kim treh phong, katba ki don pat kumba 30 ne 40 ngut kiba leit ban rejistar kyrteng hynrei kim pat siew ia ka pisa, kiba la siew ki la siewkai ia ka pisa” ong u President ka Hynniewtrep nongkitnong Association u bah B.Jyrwa ha ka jingiakren bad u Rupang .