” Balei hap ban da aiti ha ki shipai Assam Rifles ban pynjyrngam ia ka Sohra?”

Ha ka 25th July 2021 u Union Home Minister ka Sorkar India, u Amit Shah, ha ka jingwan jong u sha Sohra u la ong ba yn aiti ha ki shipai Assam Rifles ban pynjyrngam biang ia ka Sohra. Na ka liang jong ka seng Hynniewtrep Youth Movement Sohra Circle ngi pyrshah jur ia kane ka jingthmu jong u, bad ngi sngew lyngngoh ruh ba kumno u shu pynbna ia kane khlem da don ka jingiamir jingmut lang bad ki nongsynshar shnong ka thain Sohra. Ngi buh ruh ka jingmaham ia ka sorkar jylla, u MLA, u MDC ka Sohra Constituency, ki nongsynshar shnong ka thain Sohra ba kim dei ban pdiang ia kum kine ki jingthmu namar ba kan sa buh jingeh ia ki paid nongshong shnong ka thain Sohra hadien habud namar ki shipai shisien ba ki la pyndonkam ia kano kano ka jaka ki la kam trai syndon.

Ngi sngew dei ruh ban ai jingmut ia ka sorkar ba lada ka don kum kata ka jingthmu ka dei ban ia trei ryngkat ryngkat bad ki nongsynshar shnong namar ki shnong ruh ki lah ban pynjyrngam lada ka sorkar ka ia treilang ym dei ban shu aiti sha ki shipai, ong ka kyrwoh na u Bah Demingstar Larngap, President HYM Sohra Circle.