Ha ing sma pyut, shabar pyrta synshar khuid: SSSS ia ka KHADC

Shillong, 23 Iaiong:
Ka Synjuk Seng Samla Shnong (SSSS) ha ka jingiakren bad ki nongthohkhubor mynta ka sngi ka la pynpaw ia baroh ki jingtip kat kiba ka ioh lum na ka KHADC lyngba ka ain wad jingtip paidbah bad ka la lap ba baroh ki nongtrei kiba trei ha KHADC ki dei kiba la shu thung hi da ka Executive Committee ka District Council khlem da pynbna paidbah ha ki kot khubor, khnang ba ki samla jong ka jylla kin ioh lad ban ia khun lem ia kitei ki kam. Ka SSSS ka la kynnoh ba ia ki kam ha district council la shu thung sop sop ban pynhun ia ki MDC, ha kaba bun ki MDC ki la thung ia ki bahaing hasem lajong bad kiba ieit ba thoin jong ki.
Ka la pynpaw ia ka jingsngewlyngngoh ba haduh 531 ngut ki nong trei tang 6 ngut kiba la thung lyngba ki kyndon thungkam. Halor katei ka jingthungkam thur mur ka SSSS ka la kynthah jur ia ki MDC ka KHADC da kaba ong ba kan ym myn toi ban leit ialap synshar khadar kaba khuid , sha ki paidbah katba ha ing lajong pat kaba dei hapoh District council hi ka don ka jingjaboh bad ka jing sma iwtung kaba shyrkhei.
“Pynkhuid shuwa na ing na sem lajong, sa leit sha ki iew ki hat ban pyrta synshar khadar, na ing sma pyut katba shabar pat pyrta synshar ba khuid” ong u General Secretary ka SSSS. Utei u samla u la ong ruh “ Ki MDC ki thungkam tang ia ki ba haing hasem lajong”. Katkum ka ain wad jing tip, kaba la wanrah da ka SSSS la iohi ba ka jingthungkam kaba jur bha ha District Council ka dei naduh u snem 2005 shajrong ter ter haduh u 2013-2014, bad shuwa ia katei katto katne ka la don ka jingthungkam ha u 2003.
Katei ka seng ka la pynpaw ruh ia ka jingsngew donbok ba ka sorkar ka la shim noh ia ki skul na katei ka council , “Lym kumta ngim tip shuh katno ngut ki khynnah jong ngi ki ban pep skul, bad kiba kum kino ki nonghikai ngin ioh” ong u bah Pathaw haba kren ia ka kyrdan pule ki nonghikai jong ki nongtrei ka District Council.