Khlem nongrim, ym lah ban pynbeit pud

B.M.Lanong

Kaba kongsan tam ban poi noh shaba kut halor u pud u sam, ka long ban don katto-katne ki nongrim ban iapdiang lang hapdeng ki ar Sorkar Meghalaya bad Assam, lym kumta yn ym lah da lei-lei ban pynbeit ia kane ka kam ba la sah teng 50 snem lynter.

Na ka liang ka Sorkar, ki DistrictCcouncil, ki Hima, ki Seng Bhalang (SBL), ki briew shimet kum ki MLA, MDC bad kiwei lane ki kynhun ruh, kan long kaba dei ba kin ym iakren kulmar khlem nongrim, namar ha kine ki sngi la iohi ba don ki nongmih khmat paidbah kiba pynpaw ba dei ban pynbeit halor ki nongrim jong u pud-u-sam ki Hima Khasi.
Don pat ki kynhun na Jaintia kiba la pynpaw ban pynbeit noh da kaba pynphai noh tang ia kito ki Shnong ki thaw ba shong ki Khasi-Pnar.

Don pat kiba pynpaw ba dei ban pynbeit halor ki nongrim jong ka jingia mynjur lang, yn ai kino, yn shim kino (give and take policy), hap ia pynbeit.

Bad kumta ter-ter, ki jingsngew kiba la kijong-kijong bad lada long kumne, kan ym beit shuh bad katba nang slem ka Assam ba khlain bor, kan nang iai thom.

Kumno Sngew Ka Sorkar Congrad?
U Chief Minister thymmai ka Sorkar Assam, u Himanta Sarma u la kob ba un buh thymmai 50-60 tylli ki ktem pulit ha ki shilynter pud iajajia bad ka Meghalaya. U Chief Minister Conrad, tip u tip ne em ia kane, namar ngim shym iohi ia ka jubab jong u, ne tip ula iakren haba ula leit shongkai-bam ja te ym tip.
Shongkai ne shong shisha, kata kam pher. Kaba donkam ban jubab, ban tip ki paidbah ka long ba ka Meghalaya ruh kan leh kumjuh. Lah ban buh ktem kumjuh, kan eh aiu kata. Da ka Mizoram barit ruh kam aili. Hynrei jar-jar ym shym iohi jubab na ka Meghalaya, kane ka dei kaba ma.
Ki Nongrim Ki Donkam

1. La kumno-kumno, wat lada ym iabat pyrkhing than, hynrei tang ban shu pynkynmaw bad kdew ia ki jingshisha, donkam ban kdew ia u pud u sam ka ri Khasi-Jaintia, ka Garo Hills ruh hangne-hangtai, katkum ki map bad ki dulir barim, ha kaba synshar ki Hima Khasi-Jaintia, naduh mynhyndai.
2. Namar ba ki jingiakren ki la don teng ha ki por mynshuwa kum ka Chandrachud Committee (1985-87), kam pher ban phai (refer) sha ka report (kaiphot) jong ka, balei kam shym lah ban iaid shakhmat bad balei ki Sorkar Congress Delhi, Assam Meghalaya ki la shu iehnoh lyngkrang?
3. Donkam ruh ban peit ia ka paragraph 20 jong ka Bynrap-6 (Sixth Schedule) ban iohi ia ki jingshisha kumba ki long ha kaba sdang, namar ka report jong ka Chandrachud Committee 1987, ka kdew ba ka Meghalaya ka la kdew ia ka nongrim jong ki pud ki sam jong ki Hima Khasi, ka Assam pat ka pynksan halor ka jingkdew ka Constitution ka ri India, ba la kdew thymmai katkum ka NE Areas (Reorganisation) Act 1971, kaba la sdang pynjari naduh ka 21.1.1972, ka sngi ba la kha ia ka jylla Meghalaya. Ym tang katta, hap peit ruh ia ki report ha ka “White Paper on Indian States 1933” bad kiwei-kiwei de, kiba kdew halor u pud u sam kane ka thain, la kumno-kumno tang ban shu tip ruh, namar ka Assam ka kdew ia kitei ki bynta, haba ka shem hangno kan iarap ia ka.
   Dei kine kiba nang pynjwat ia ki jing iapynbeit, namar baroh arliang ki pynksan la kijong ki nia bad ki nongrim.
   Kumta ki riew shimet ne kino-kino kim dei ban shu kren lymwir ha lyer, khlem sngewthuh ia ki jingshisha kumba ki long, namar ki jingkren kulmar, ki shu pynmih tang ki jingkulmar suda, ha ka jaka ban pynsuk-pynjanai.
   Ka long ka jingshisha ba kine ki kam ki kyllain bha ban sngewthuh wat da ki riew shemphang ruh, nalor ba ki long kiba la slem bah, ki long ki bynta kiba tang ki riew ain ba shemphang bha kiba lah ban batai (interpret).
   Ha ka jingshisha ka la kham suk ban pynbeit pud ha kitei ki snem ba dang khluit ka kam, tip balei ka Sorkar Congress Delhi, Assam bad Meghalaya ki la shi ieh noh lyngkrang? Ynda kdew ia kine ki jingshisha, ki Congress ki bitar pynban.
   Kumta ka donkam ia ki nongrim ba don jingmut ba lah ban poi sha ka jingiabeit (acceptable principles).
   Ka Sorkar u Conrad Sangma kan hap ieng halor ki nongrim ba don jingmut kiba kum kine, lane kiba iasyriem kum kine, khlem pyndem tdong ha ka Assam, lada ka leh donbor khlem nongrim.
   Haduh mynta u Conrad um pat khot iasyllok ia ki Seng kiba iadon lang ha ka MDA. Tip u mut ban leh kumno, ngin sa iapeit, namar ngi la dep ai jingmut ia u ba un khot.