Ka jaka bret niut ha marten

Ka jaka bret niut ha marten, ka la dei ka mat iakren, kaba kongsan bha ha kine ki sngi bad hap ai khublei ia ka Seng Samla Mawlai Pyllun (SSMP), ba ka pynkhie im ia katei ka mat, da kaba ka leit khang tala, ia katei ka jaka bad kaba la pynlong ia u myntri pynroi sor, ba un hiar dalade hi ban leit mad ia ka jingsma iewkhong, katei ka jaka.

Kaba lyngngoh, ka long ba ha katei ka jingleit, u myntri, u pyni, ba ka jingmut ban wad jaka bret niut, kumba ka dang shu sdang bad ula batai, ba u dang pynkhreh ia ki jing ialang ban iakren halor katei ka kam, ha kine ki sngi.

Ha shwa kata, to ngin ia kynmaw, ba mar ia wan kane ka sorkar thymmai, U Bah Hamlet Dohling, myntri pynroi sor, ka Agatha Sangma, MP ka Tura, U bah Samlin Malngiang myntri ka tnat PHE, ki la leit jngoh ia ka Kerala, ban peit nuksa, ia ka rukom bret niut ha kawei ka nongbah Alappuzha, jong ka Kerala bad kumta, ki sengbhalang, ki la dei ban buddien ia katei ka jingleit, la ka la mih soh eiei, ne ka shu long tang ka jing pyn lutphut ia ka pisa paidbah.

Hangne, ka wan sa ka jingwad jaka bret niut bad ka mat, ka long, ba lada ka Star Cement, ka ioh jaka ban tih mawshun, ka Lafarge, ka ioh jaka ban tih mawshun, ka tnat Urban Affairs, ka la kurup ia bun bah ka jaka sha New Shillong bad ki ophis sorkar India, ki la shu iohei ia ki phew hajar hectare bad nangta, lada ka PWD, ka shu kurup jubor ia bun bah ki jaka jong ki riew shimet bad ka sorkar jylla, ka dang wad ram ban pyn bhabriew ia ka 9lad; kumta haei, ka don ka jingeh ban pynbha ia jaka bret niut ha Mawlai?

Ha ka jing shisha, ka jing iakren hi kaba naduh mynshwa, ka long ba katei ka jaka theh niut, ka dei ban long, da ka jingstad jong kane ka juk bad kam dei shuh, ka jingthang niut ban pyniewkhong bad lada ka sorkar jylla, ka la shim khia ia katei ka kam, khlem pep, kan nym mih ia ka jing ia bunkam jong ki nong Mawlai bad ka sorkar hi ruh, ban iakren ia kajuh shi kajuh, haduh ha kine ki sngi.
Ka por kam ap shuh bad u myntri ka tnat pynroi sor, ula dei ban thied jaka noh mardor bad ban shu tylliat noh ia ki niut, namar lada ki sma iewkhong, kumta kin iai mih ki jingshah ujor, wat lada leit bret sha lawbah ruh.