Shillong: Ki don 21 ngut kiba iap, na ka jingpang khlam covid 19 ha ka 48 kynta ba ladep, ha East Khasi hills District, ong ka kyrwoh ba la phah da ka Deputy Commissioner, East Khasi hills.
Na kitei ki kynthup ia 11ngut na ki nongkyndong bad sa 10ngut na ki jaka sor jong ka district bad la iathuh ba 19ngut na kitei, ki dei ki bym pat dep injekshon bad sa 2ngut ki bym pat dep injek pura.
Ki don 3ngut kiba iap ha iing, ha kaba 2ngut ki la iap, ha shwa ban poi ha hospital bad sa iwei iba iap ha iing bad 18ngut kiba iap ha hospital.
15ngut na kitei ki wan sha hospital, hadien ba ki la don ha ka jingpang, la kumba 48 kynta bad ki 6ngut ki dei kiba wan shah sumar, hadien 5 sngi ba ki la don ha ka jingpang. 12 ngut, ki dei kiba iap, hadien ba ki la don ha hospital, kumba 5 sngi kynthih.
Ka jingkiew jong kiba pang bad kiba iap, ka nang jur ha ka district bad kumta, la bthah ia ki paidbah, ba kim dei ban leh sting, ia ki dak ki shin, kiba iadei bad ka jingdon jong ka jingpang khlam covid.
La ong shuh shuh, ba ki dak ki shin ki pyni, ba kito kiba la dep injek, lada jia ba ki ioh pang ruh, ki kham duna, ba kin ioh pang jur, lane ba kin poi hospital lane ba kin iap na ka jingpang khlam. La ai jingmut namarkata ia baroh ki nongshong shnong,ba kin shah injek noh kloi kloi.
Phi don ban ong eiei?