Kiew Kashari ka MCTOO, ban weng ia ka hukum ka NGT

Shillong, 21 Iaiong:  
Ka Meghalaya Com mercial Truck Owners and Operators Association (MCTOOA) ka la ujor sha ka Kashari ban dawa weng noh ia ka hukum ka NGT ban siew ia ka bai mariang haba shalan dewiong.
Ia ka jingujor la leh ha ka 6 tarik Iaiong da ka MCTOOA da u president Bah Augustine Shanpru.
“Ngi la pan bor ban weng noh ia ka hukum ka NGT kaba bthah ia ki malik dewiong ban siew ia ka bai mariang haduh T. 480 shi  metric ton (MT) u dewiong”, la ong u Bah Shanpru ha ki nongthoh khubor mynta ka sngi.
Katkum ka jingong u Bah Shangpru,  kane ka jingbthah ka NGT ka la ktah jur ia ki malik bad ki trai par dewiong ha ka ioh ka kot bad ka kamai kajih jongki.
“Ngi dawa na ka Kashari ban pynlait ia kane ka jingsiew bai mariang ba la buh da ka NGT na ka bynta ki malik bad ki trai par kiba dei na kane ka jylla”, la ong u Bah Shanpru.
U la ong ba ka Kashari ka la buh ban pynlong ia ka jingbishar ha ka 30 tarik Jymmang ha nongbah New Delhi.