Ki trai jaka bad u pud u sam

Khyndiat sngi mynshwa, ngi la iakren, halor ka mukotduma jong ka trai jongka, ha Raid Marwet pyrshah ia ka sorkar Assam; kumta hangne, ruh, ka mat kaba donkam, ka long ba haba ka sorkar Meghalaya, ka sdang ban iakren ia u pud u sam, ka dei ban iakren bad pyni da ki jing shisha bad kita ki long (i) ka kot khyndew bad (ii) ka jingdon ki trai jaka.

Ka Mizoram, ka kynnoh ba ha ki khappud jong katei ka jylla, ki don bun bah ki khar Bangladesh, kiba shong ba sah bad kitei ki dei ki nong pyn kulmar shnong, ki nong pynthut ia ka suk ka sain bad kitei ruh, ki dei kiba kam trai ia ki jaka puta jong ka Assam.

Ha Langpih jong ka West Khasi hills, kiba leh trai ia ki jaka puta, kim dei ki Assamese, hynrei ki dei ki khar Nepali bad kumno, kin leit tip ia u pud u sam, haba ki dei kiba shu leit buhai shnong sha katei ka khappud bad lada ia nujor ia ka rta ba ki shong ha kitei ki jaka, kam pat iahap eiei ruh em bad ki Khasi, kiba la im da ki pateng bynriew bad kiba don, la ka jong ka it ka hima, kaba la ithuh naduh ka thymmei jong ka jingthaw ia ki District Council.

Kumta haba ka Meghalaya, ka leit ban iakren kam pud bad ka Assam, ka dei ban sngewthuh ba ki jaka puta, kim dei na ka bynta ban pynheh ia u pud u sam jong kano kano ka jylla bad ban shu kam trai, khlem da don ki sabut kiba biang, hynrei haduh mynta, ki Khasi, kiba don ha Langpih, ha Block I, ha Khanduli bad ha ka thain Khanapara, ki don ia ki jing shisha jong ki ar tylli ki bynta, ki kot khyndew lane ki trai shnong.

Ka Assam, ha kine ki sngi, ka leh trai khlieh, ban leit tei ia ki iing ki sem, ki surok bad kiwei ki jingtei sha ki jaka jong ki riew shimet bad katei kam lah ban long ka dak jong ka jing long trai, hynrei, ka dei pynban, ka dak jong ka jing kurup jaka jubor bad ka jingtuh ia ka hok jong kiwei; namar ba lada ka Assam, kaba ka rta jongka, ka ia ryngkat bad ka jing laitluid ka India, ka dang wad jaka ban thaw surok, ban tei iing tei sem, kumta ka pyni, ba ka dang sahdien shi katdei em ban ia ka Meghalaya, kaba dang don mynta 50 snem.
Hap pyn kynmaw biang ruh, ba ka jing iakren kam pud kam dei satia hapdeng ka Meghalaya bad ka Assam, namar ba ki ia kam trai baroh arliang, hynrei, ka jing iakren ka dei bad ka sorkar India.