Shillong: Ka Khasi Students Union Lapangap Unit mynta ka sngi ka la ther kylla ia u CEM ka JHADC halor ka jingkynnoh ba bam armaloi ia ki paid khappud. Kane ka jingkynnoh u CEM ka JHADC ka long haka jingai jingkren jong u haka Dorbar Lyiur kaba la long ha ka 22tarik Naitung 2021, ha kaba ula pynpaw iaka jingbitar ba don ki briew jong ka thaiñ border ki bam armaloi .
Na ka liang u GS ka KSU Lapangap Unit, U samla Saikial Sumer u la ther tyngeh iaka jingkren khlem nongrim jong u CEM ba kumno u nang tang ban batai stad haba um ju hiar sha ki thain border area shisien ruh na ka bynta ban peit bad jngoh iaka jingeh ki paid khappud kumba leit jngoh ki MAC (Member of Autonamous Council) ka KAAC na Assam kiba leit jngoh bad leit hiar man ka por sha khappud.
Ka long kaba sngew lyngngoh bad sngewphylla kumno u briew ba shong bam kwai tang hapoh kamra ophis u nang ban batai stad katba ia ka jingeh sha thaiñ border um ju don ka jingbah khlieh shisien ruh lait tang ki Sengbhalang, ong ka kyrwoh.
Shuh shuh u General Secretary ka KSU Lapangap Unit ula kynnoh ruh ia u CEM dakaba ong ba haka por ba don ka jingkhajia pud ha Psiar bad Mooluber u ma Thombor Shiwat u la kren shai ba wat tang shi inchi ka jaka ba hap hapoh ka jingpeit jong ka JHADC kam dei ban leit sha Assam kine ki jingkren pynbiej paidbah kim iahap shuh haka juk shai mynta, U la ong ruh ba u CEM u dei ban pynshai kiei kita ki shnong ba don kti ha ka bam armaloi lada ym lah ban pynshai kamut ba u dei u nongialam tieng eit.
Ka KSU Lapangap Unit kadei ka tbad treikam kaba don sha ki jaka ba kajia bad ka Assam ka buh ia u dak jingkylli baheh ia u CEM ba, balei haba ka khlaw jong ka tnad Forest jong ka District Council kaba don ka Khanduli kaba la die Auction hakine ki snem ba lah lah naka bynta ban pom khlaw, ka la shah khang ha ka Assam haba kat ka District Council ka don ia ki kot ki sla kiba biang ruh? “Hato ym dei ka JHADC mo ba bam ar maloi haba kumne”, la ong ka KSU. La ong shuh “Kumno ka jaka khlaw jong ka JHADC katba ban pyndonkam pat ym lah, shah khang pynban haka Assam, hato balei ka JHADC kam don bor ban leh eiei halor katei ka jingkhang ka Assam? Hato ki nongialam ka JHADC kim tip tikna mo ba katei ka dei ka jaka jong ka bad balei ki ailad iaka Assam ban khanglad iaka jingpom dieng haka jaka ka JHADC? Nalor ba phi don ka waitlam ha kti dang shah knieh ki jaka ha ka sorkar Assam, hato ka don jingmut mo ban bat iaka waitlam haka kti lada phim nud ban mait iaki nongshun?” pynkut u khubor na u General Secretary ka KSU Lapangap Unit u Samla Saikial Sumer.
Phi don ban ong eiei?