Trei dain dain ia ka surok T. 58 klur na Umrit sha Umdu, dawa ka RBYF

Nongpoh:U Bah Lan Syngkli, President ka RBYF 20mer Circle, u la ong ba ka seng ka dawa na ka sorkar jylla bad khamtam eh ia ka tnat PWD, ba ka dei ban btah ia ki Kontraktor ba ki dei ban trei noh dain dain ia ka surok ba 27 KM ei ei, kata na Umdu sha Umrit, ka surok kaba la buh Mawnongrim ha u snem 2020 bad kaba la ioh jingpynmang tyngka na ka World Bank haduh T. 58 Klur.

Haba kren sha ki lad pathaikhubor, u Bah Lan Syngkli, u la ong ba ka seng kam lah ban peit ba ki paidbah kiba sah ha Ri Bhoi Sepngi, ba kin iai mad jingeh ha shilynter ka jingim, tang namar ba sniew palat ka surok na Umdu shaduh Umrit, kaba dei ruh kawei na ki surok kaba donkam tam eh na bynta ki paidbah kiba sah ha katei ka thain.

U la ong ruh, ba kumba ka long mynta, ka jingsniew ha ki bynta jong katei ka surok, ka la pynsyllang shisha ha ka leit ka wan ki paidbah bad khamtam eh haba don ki kam kyrkieh, kum ha ka pang ka shitom ne kiwei pat ki kam kiba ktah ia ka iap ka im.

Kumba ka long mynta hi ki bynta na Pahammawlein 20mer sha Umdu, ka surok ka la bha, namar ba la shna bha lyngba ka skim PMGSY bad kaba la kham pynsuk ha ka leit ka wan ki paidbah, hynrei ha kitei ki bynta na Umdu shakhmat bad shaduh Umrit, ka surok ka la sniew tasam bad kam long shuh wat ban iaid ki kali rit, la pynpaw utei u nongialam ka RBYF.
Shuh shuh, u la ong ruh ba ka sorkar ka la dei ban kham pyrkhat kyrpang halor katei ka surok, namar wat ia u Mawnongrim la wan ban buh da u Conrad K. Sangma, Myntri Rangbah ka sorkar jylla, ha ryngkat u Bah Prestone Tynsong, Symbud Myntri rangbah bad uba dei ruh u Myntri ba deipeit ia ka tnat PWD, nalorkata, katei ka surok ka dei ruh kaba donkam eh na bynta ka iaid ka ieng ki paidbah kiba sah ha Ri Bhoi Sepngi, pynban kumba ka long mynta ym pat iohi dak ei ei ruh em halor ka jingpyntrei ia katei ka surok, laitnoh tang ha ki katto katne ki bynta ba dang sdang ka shna pynheh ia ki nala pyntuid um.
Namarkata, ka seng ka dawa na ka sorkar jylla ba ka dei ban shimkhia mardor ha ka ban shna pynbha noh kumba la dep ban pynbna, khnang ba kan pynsuk ia ki paidbah, kiba iaid ba ieng bad kiba pyndonkam ia katei ka surok, u la bynrap.