Ïa kynduh ka KAS ïa ki nongïalam BJP, halor ka ktien Khasi

Shillong:U Prof. D.R.L. Nonglait, President KAS, u Dr. K.D. Ramsiej bad u Dr. R. P. Kharshiing, myn hynnin ka sngi, ki la leit ban ïa kynduh ïa u Bah Ernest Mawrie, President, BJP, Meghalaya State Unit bad ïa u Dipayan Chakraborty, Vice President BJP, Meghalaya State Unit ban kyrpad ïa ki ban ïakren ïa u Amit Shah, Union Home Minister ka Sorkar India ban pynrung noh ïa ka ktien Khasi ha ka khyrnit baphra ka Riti Synshar ka Ri India. U Prof Nonglait u la ai ruh ïa ki kot ki sla kiba donkam ha u Bah Mawrie, khnang ba un lah ban rah ïa ki jingshisha kiba ïadei bad ka ktien Khasi ha ka jingïakren bad u Amit Shah.

Ha ka jingïakren, u Bah Mawrie, u la kular ban ïakren ïa kane ka kam bad u Amit Shah kumjuh ruh bad kiwei kiwei de ki nongïalam ka BJP na ka thaiñ shatei lam mihngi. U Bah Mawrie u kubur ba ka ktien Khasi ka dei kaba la kham ïaid shaphrang napdeng ki jait ktien ka thaiñ shatei lam mihngi, kumta ka la dei hok ban ïoh rung noh ha ka khyrnit baphra ka Riti Synshar ka Ri India.