Bun ki nongialam ka thain shatei lam mihngi, kiba shah sngap tuh ki telephone jongki

Shibun ki nong ialam sengbhalang bad ki nong ialam sain pyrthei, jong ka thain shatei lam mihngi, ruh ki shah sngap tuh ki telephone jongki, ong ka khubor, ba la pynmih ha ka The Wire.

Ki nongialam ba rangbah jong ka NSCN (I-M), kiba la shah sngap tuh ha ka kompeni, kaba na Israel, ki kynthup ia U Atem Vashum, Apam Muivah, Anthony Shimray bad U Phunthing Shimrang.

Ka jingsngap tuh, ka dei ruh ia ka number jong U Anup Chetia, u nongialam ba la wan iakren bad ka sorkar jylla, uba dei na ka United Liberation Front of Asom (ULFA). Kawei na ki phone number jongu, la ju sngap tuh bha, naduh u snem 2018, ong ka webiste The Wire.

Ym tang katta, sa ka number jong u nongai jingmut ka AASU, U Samujjal Bhattacharjee, ka dei kaba la ju sngap tuh da ka jingstad jong ka Pegasus software. Nangta sa u nongthoh khubor na Manipur, uba shong ba sah ha Delhi, U Malem Ningthouja, u dei sa uwei, uba la ju sngap tuh ia ki jing iakren phone jongu.