To pynim ialade!

AIS SUJA

“To Pynim ialade, ka ktien u Blei ka ong – “To pynim ialade”. Kumno ynpynim ialade? Lehse don ki ban ong kumno ynpynim haba ngi dangim? U Blei um ju kren ia kaei kaei kaba kynja met ne kynja doh hynrei ia kiei kiei ba kynja mynsiem kaba mut ba u briew un pynim ia la ka mynsiem ban lait ka leit dujok ding kein.
Ha ka por ba u Apostol Petros u ialap ha ki Israel u ong ha ki – “To pynim ialade na kane ka pateng bynriew ba kynriang”. Ki kam ki Apostol 2:40. Ka pateng jong ki khun Israel ka la long ka pateng kaba kynriang ka bymju iaid beit, kynriang nadong shadong. Ymdon u ba bna ymdon u ba sngap ymdon uba kohnguh hynrei tang ka jingpyneh ryndang suda.

Ki Israel bad ki rangbah jong ki ki sngewhok ha kata ka niam ka rukom kaba ki don ki sngewskhem ha kita ki Hukum u Moses, hynrei wat ia ki hukum kim lah ban leh. Kat haduh ba U Jisu ula wan longbriew sha kane ka pyrthei ha Israel, ki Israel kim ngeit bad kim pdiang ia u.

Na kata ka daw u petros u pyrta u ong – “To ka ing Israel baroh kawei kan tip skhem ba u Blei u la pyllong u Trai bad u Khrist ia une u juh u Jisu, ia uba la sahnarphna ma phi. Ki kam ki Apostol 2:36.
U Petros u pyrta, te ki la iohsngew ia kane bad la dung ngak ia ki hala ka dohnud bad ki la ong ha u petros bad ha kita ki Apostol – Ah para kumno ngin leh? U Petros u la jubab ia ki ong – “To phin kylla bamut bad yn pynbaptis ia phi uwei pa u wei ha ka kyrteng u Jisu Khrist IA KA BAN IOH MAP IA KI POP bad phin iohpdiang ruh ia ki Jingai u Mynsiem Bakhuid (gift of the holy spirit). Ki Kam ki Apostol 2:36-38.

Ki Israel ki tip bha ia u Jisu, wat lada katta ruh u Petros u hap ban iathuh ha ki ba uta u Jisu u long u Trai bad u Khrist ia uba ki Jiw (Israel) ki la sahnarphna. Dei ha ka kyrteng une u Jisu ba u Petros bad ki Apostol baroh ki ioh ka bor ban ialap bad ban leh ki kambah bad ki dak khyllah de, dei ia kane ka daw ba pyllong ia ki ban ia kyndit. Wat la katta ruh kim pei shkor ia ki khmat jong ki latap matlah. Hynrei don napdeng ki Jiw kiba pdiang bad la pynbaptis ia ki.
Ka juk kaba ngi im mynta kam da pher eh na ka juk ki khun Israel, namar ba ngi Ia wad tang ia kiei kiei kiba kynja doh. Ngi ngeit ha ki niam ki rukom kat kum ka jinghikai pateng la pateng. Ngi tip shaphang u Jisu, ngi sngew ia u hynrei ngim leh pat kat kum ka jinghikai ka ktien u Blei. Ha kiei kiei baroh ngi sngewbiang ngi sngewbahok ha la ka jingim hynrei khlem da it da bishar ialade kumno ngi long bad balei ngi don hangne bad shano ngin leit ha kawei ka sngi.
Lada ngin leit noh na kane ka pyrthei, Hato ngi ladep pynim mo ialade? Ngi im ha ki sngi ki bymthikna ka jingim bymthikna, ka pyrthei kala kynriang nadong shadong, kynriang ha ka longbriew manbriew kynriang ha ka pyrthei ka mariang. Ki jingpang ki ngat halor u briew khlempoi pyrkhat, ki jingjia kiba sngewsih kiwan syndet, bun ha kylleng sawdong pyrthei ki briew ki khlad noh na kane ka pyrthei khlempoi pyrkhat, ka la long ka jingjia ba sngewsih namar kane ka jingpang khlam kaba la tap ia ka pyrthei kam map iano iano.

Dei halor jong ka jingbymthikna ka jingim briew ba u Blei u kwah ia u briew ban pynim shwa ialade. Pynim iala ka mynsiem. To phin kylla kaba mut bad yn pynbaptis ia phi. (Repent and be Baptise) kamut ba u Blei u kwah ia ka jingkylla ha u briew dakaba un phla iala ka mynsiem ban lait na dujok ding.
U Blei u dang ai por ba ki briew kin phai kin kylla bamut, kam mut tangba ladon kyrteng haki balang. Ki balang kim lah ban pynim hynrei tang ka snam u Jisu hi, kita kein kiba lasait ia ki jainkup jongki ha ka snam u Khunlangbrot. Jingpynpaw 7:14.
U Jisu u ban jur ban phla pop (Repent) ban kylla kabamut katba dang im ha ka pyrthei khnang ba uta u briew unioh bynta ha ka Jingmihpat hadien ka jingiap. Dei nakata ka daw ka ktien u Blei ka ong – “Uba suk bad uba khuid long uta uba don ka bynta ha kata ka Jingmihpat kaba Nyngkong”. Jingpynpaw 20:6. Kaba mut, ba uta u briew u PYNIM IALADE, n aka jingiap junom ha dujok ding.

U briew u hap ban ieng marwei, ym don ba lah ban pynim ia u lada ma u hi um wan sha ka jingkylla kabamut (Repent), namar u Blei u ladep ai ha u briew kamon ban jied khlem pynbor.
To pynim ialade – Ki kam ki Apostol 2:40.
Amen.