Plie u myntri, ia ka MFC ba 32 lak ha Lamin

Jowai, 16 Iaiong:
U Myntri ka tnad jong ka koit ka khiah, u ma AL Hek u la plie paidbah ia ka Multi-Purpose Facility Centre ha ka shnong Lamin kaba pyntrei hapoh ka Border Area Development Programme ha ka jinglut kaba la kot haduh T. 32 lakh.
 Ha kane ka sngi, la iadonglang ruh u MLA ka thain, u ma Stephanson Mukhim kum u symbud kongsan, u MLA barim u ma Lahkmen Rymbui, u Assistant Director, u bah G. Ranee, BADO bad ki riew rangbah ka shnong. 
Haba kren ha ka jingialang plie ia katei ka iing dorbar, na ka liang u kongsan bad u symbud kongsan u la kyntu ia ki paidbah nongshong shnong ba kin pyndonhok ia katei ka iing da kaba sumar bha ia ka, namar kadei ka iing kaba lah ban ai ia shi bun bah ki jingmyntoi sha ki paid nongshong shnong. 
U Myntri u la iaroh ruh ia ka Dorbar shnong kaba la lah ban pyntrei hok ia katei ka skim sorkar ha kaba ki la lah ban pyndep ruh ha ka por kaba lyngkot.
Ha kane ka sngi, ki nongialam shnong ki la ai ruh ia ka dorkhas sha u Myntri na ka bynta ban pan jingiarap skim sorkar na ka bynta ban pynioh Computer ia ka Jawaharlal Nehru Memorial LP & UP School. Ia kane ka skul la seng ia ka naduh u snem 1964 bad shen kan sa dap noh 50 snem ka dang donkam ki jingiarap na ka sorkar. Nalor ki Computer kiba la dawa bha ha kane ka juk Technology, katei ka skul ka dang donkam ruh ka jingithuh kum ka skul ba pura namar kumba long mynta katei ka skul Jawaharlal Nehru Memorial la ithuh tang ia ka Lower Primary katba ia ka UP pat la ithuh tang kum ka Deficit School.
Ha katei ka dorkhas, ka Dorbar shnong ka la pynpaw ruh ha khmat u Myntri ka koit ka khiah halor ka jingdonkam ban kyntiew kyrdan noh ia ka Lamin Sub-health Centre (SHC) sha ka Public Health Centre (PHC). “Da ka jingtrei shitom ka ANM bad ka ASHA, katei ka SHC ka la iarap shibun ia ki briew ha katei ka shnong kaba don haduh palat 270 ki thliew iing bad palat 2000 ngut ki paid nongshong shnongm hynrei haba khamjur ka jingshitom pat, ka buh jingeh ia ki duk ki rangli ban leit phah sumar kham sha jngai”, la pynpaw ka Dorbar shnong.
Ha kane ka sngi, u bah AL Hek u la noh synniang ruh sha ka Sianglamin Pohthmi Memorial Secondary School da kawei ka Computer Set ha ryngkat ka jingsyniang lang ka All Lamin Welfare Association, Shillong kumba T.8000/-. 
Kiwei pat ki kynrem ki lyngdang kiba la ai jingkren ki kynthup ia u ma Stephanson Mukhim, u u Assistant Director ka tnad Border Area Development, u ma SP Gashnga nalor kiwei kiwei.