Maham U RS Umkhyrmi ia ki nongrep Pnar

Jowai, 15 Iaiong:
Ka Khasi Students’ Union Jaintia HIlls District Unit (KSU-JHDU) hapoh ka jingialam u President, u Ohibait Dkhar bad u General Secretary, u Fivestarson Suiam ki la leit ban ujor sha u Deputy Commissioner ka West Jaintia Hills halor ka shithi jong u Rangbah Shnong lane Goan Bura jong ka shnong Umkhyrmi kaba la mana ia ki paidbah Pnar ban hiar rep sha katei ka thain. Na ka liang ka KSU ha ba ia kynduh ia u DC mynta ka sngi ha Ophis treikam jong u bad ki la dawa ban buh pulit pahara ha katei ka shnong Saba na ka bynta ban iada ia ki paid nongrep khamtam ha kane ka por ba la dei ka por thung por bet.
katkum ka shithi kaba la suh lang ha katei ka dorkhas, u Rangbah shnong (Goan bura) jong ka shnong Umkhyrmi, la thoh, “Da ka bor jong ka Committee shnong nga phah ne ai jingtip shaphi ba uno uno ne kano kano ka briew naka shnong jong phi kiba wan hiar rep bad shna iing ban shong ne ban thung da kino kino ki jingthung kiba neh ngin ym shah ia ki ban shna ne thung hapoh u pud jong ngi ka Karbi-Anglong District Assam, ngim ym shah ruh ban shong bri ne ban ri ia ki mrad. ki lah ban rep ki bri lum ban bet ne thung tang da u kpa hynrei kin nym lah ban thung da kiwei kiwei ki jait jingthung. Lada jia ba kino kino ki jingeh ne shitom na ka liang ka sorkar ngin nym kit khlieh ia kata. Te namarkata, phi ki rangbah ne ki Gaun Bura phin sngewbha ban sneng ia ki paidbah ioh don mano mano ba leh pyrshah, te kumta phin sngewbha ban ia pyntip paidbah. La soi da u Fredrick Timung (Goan Bura)”. 
Ka KSU ka la pynrem jur ia utei u Rangbah shnong ka shnong Umkhyrmi ha kaba u la khang ia ki paidbah Khasi-Pnar ban rep ban riang lane ban ri jingri lane ban thaw ia ki trep sah bri. “Kane ka jingleh jong utei u rangbah shnong ka dei ka jingthmu jong u ban wanrah ia ka jingiasngewpher jaitbynriew hapdeng ki paid Khasi-Pnar bad ka jait bynriew Karbi kiba shong basah ha ka thain Khappud”, la ong ki Nongialam ka KSU-JHDU.
Kitei ki nongialam ki la kyntu jur ia u DC ka WJH ban shimkhia halor katei ka shithi jong u Rangbah shnong ka Umkhyrmi khnang ban lait na kano kano ka jingiasngewpher jaitbynriew ha katei ka thain.