Ong ka NPP “Balei hap hiar shuki U Conrad na ka MDA? Hato ymdei mo u Mukul na ka Congress?”

Shillong: Ka long kaei kaei kaba i thamula ban peit ia ka politik ha Meghalaya ba u Mukul Sangma lem bad u para jong u, u Zenith Sangma ki la phah hiar shuki ia u Myntri Rangbah ka Jylla, u Conrad Sangma. Baroh ngi tip ia ka jinglong jingman jong ka Congress ym tang ha ka jylla Meghalaya hynrei ha ka Ri India hi baroh kawei ba kane ka Party ka la hiar arsut kat nang mih ki sngi bad kan sa poi ruh ka sngi ba kan duh jait syndon. Ka Congress kum ba ka long ha Meghalaya ka bun sa tang ka jingjyrsieh bad ka jingiakniehbor wat para ma ki ruh. Hangne ngi iohi ba u Mukul u shim kabu ia kane ka jinglong jong ka Seng da kaba pyndonkam da ki buit jakhlia jong u kumno ba un long biang uta u nongialam u ba pawkhmat uba ki briew ki niew burom ia u khamtam kito ki bym ju tip ia ki kam beaiñ uba ju leh ha ki por ba u don ha ka bor, ong ka kyrwoh na U bah Nickey Nongkhlaw, uba dei u nongkren jong ka seng NPP jong ka jylla.

“Kane kam dei ka sien kaba nyngkong ba une u rangbah u la pyni ia ki kam leh donbor jong u. Ha ki snem ba u dang long u Myntri Rangbah ruh, la ju bun napdeng ki nongialam ka Seng Congress ruh ki ba ieng ban pyrshah ia bun ki kam ba iadei bad ka roi ka par ki briew ka jylla. Hangne ruh, u Mukul da ki ‘buit myrsiang Sadew’ bad kam buitpoh jong u, u la lah biang ban pynngop ia ki ba kin ngeit bad shaniah ia u. Hynrei ynda haba ki nongkitkam ba radbah ka Seng ki la dap bad ngiah shoiñ ia u, ngi iohi ba ha u snem 2017-2018 bun ki riew rangbah ki la phet noh ban iasnoh noh bad kiwei ki Party. Haba kumta, ngi lah ban ong ba hato u Mukul um dei ban peit shwa ia la ka jong ka rympei shwa ba un phaloh umsaw ia kiwei pat?” ong ka kyrwoh.

La ong shuh shuh, ba ki kam u Mukul kim ktah tang ia ki paraseng jong u ha kito ki snem ba la leit. Ka jingkthang bad jingsngewsih ki paidbah ha Rilum Khasi, Jaiñtia bad Garo ruh ka la paw shynna ha bun ki khubor bad jingthoh bapher bapher ba ki briew baroh ha u 2018 kin ym kwah shuh ban kyrshan bad iohi ia ka durkhmat jong u ne ka Seng Congress kiba la wanrah bun ki jingbamsap bad jinghiar ka Jylla.

Haba phai pat sha ka Tnat Bording kaba long ka phang ba kine arngut shipara ki ia sngewtynnad ban khyllie na ki por sha ki por, kaba sngewphylla pat ka long ba bun ki jyrwit jyrwait kiba iadei bad paw khubor ha kine ki sngi ki dei ki jingleh jong ka Seng Congress hi ha ki 8 snem ka jingsynshar jong ka ha kaba kine arngut ki long napdeng jong kita baroh. Ha u 2017, u Mukul la jan poi sha u pud ban lilam ia ka MeECL ha kaba ula soi kontrak bad ka Renew Joule Private Limited ban seng bad shna ia ki lad pynmih bording bapher bapher bad ban leh ia kane u la sdang shwa na Ri-Bhoi, Mendipathar bad Ampati. Ha kajuh u snem hi, u la soi kontrak sa bad ki kompeni babun kum ka ETA Star Infrastructure Ltd., Brijraj Power Metallics Ltd. bad ka MSGC Power Ltd. ban pynsdang ruh ia ki lad pynmih bording na u dewiong kaba pynlong ia ka jingduhnong bakhraw ia ka MeECL. Hadien ka jingujor bad jingpyrshah na ki ba bun ki Seng Bhalang, une u nongialam u shu pynkut jyndat ia kita ki jingiasoi khlem don jingkheiñ shuh ia ki kam pisa ba u la theh ha ki. Ka jingkylli ka mih ba kaei ka jingmyntoi ba u hap ban ia soi ia kita ki kontak bapher? Hato kam dei mo na ka bynta ka jingmyntoi shimet jong u?

Nalor ba u la pyni ia ki jingbamsap jong u da kaba wanrah da ki briew bad kompeni nabar ban don bynta ha ki kam jong u, hynrei u la nang pynsohsat shuh shuh da kaba ai noh ia kine ki kontrak sha ka NEEPCO ban iaid shakhmat kaba nang wanrah shuh shuh ka sohsat ia ka MeECL. Dei na kine ki daw ba ngi iohi ia ki jinglip lait khah khah ha ka por ba synshar ka Congress ka ba neh shaduh ka saw bnai ha ka shisnem.

Ia u Mukul Sangma ban khyllie bad wad daw ia ka Tnat Bording ka long kumba u tih lypa ia ka thliew ka jingjot bad jingduhnong namar ia kine ki kam buittuh bad ki kontrak ba khyllah khyllah la leh da ma u hi bad u para jong u, u Zenith Sangma. Ka long kaba phylla ba u Mukul tad haduh kine ki sngi u dang ieng sahuh bad iai sait khuid ia kiei kiei kiba ma u lem bad ka Seng jong u ki la leh ia ka MeECL. Lada u dei u briew uba don kata ka jingiatiplem, katta um shym la nud shuh ban mih khmat bad khroh na ki paidbah ia ki votes ha ki por elekshon. Ban kyntu lei kat ia u Myntri Rangbah ka Jylla ban hiar shuki ka long kaba sammut, namar kum ba ka long mynta, ki briew ka seng Congress bad kumjuh ki paid byllien ka Jylla ki la kwah ba ma u, un hiar noh kum uta u nongialam ka Liang Pyrshah, pynkut ka kyrwoh.