Pyndep ia ki surok ha Ri Bhoi Sepngi, dawa ka HYC

Nongpoh:Ka Seng Hynniewtrep Youth Council (HYC), Ri Bhoi Sepngi, lyngba u President, Bah Alfred Lyngdoh, ka la dawa syndon na ka tnad PWD, Nongpoh Division, ba kin phah pynnoh noh ha ki Kontraktor ia ki surok PMGSY, kiba don ha ki katto katne ki bynta jong ki shnong kiba hap ha Jirang C&RD Block.

U Bah Alfred Lyngdoh, u la ong ba ki la don kumba 6 tylli ki surok PMGSY, kiba la sdang ban shna, hynrei ki bym pat lah ban pyndep tad haduh kine ki sngi. Kitei ki surok PMGSY ki kynthup ia ka surok MPGSY na Patharkhmah sha Warmawsaw, na Warmawsam sha Mawdem, Patharkhmah sha Nongwah Mawlein, surok wildlife sha Old Jirang, Paham sha Umshru bad ka Nongbirthem sha Nongbirlum.

Kumta ka seng ka dawa ia ka tnat PWD bad sorkar jylla, ba ka dei ban btah ia kito ki Kontraktor kiba la pynshna ia kitei ki surok ba kin pyndep noh ia kitei ki surok kiba ki la shu ieh khongreng tang shiteng, khnang ba kan long ka jingsuk ia ki paidbah kiba pyndonkam ia kitei ki surok, namar ka jingpynsahteng ia kitei ki surok, ka la pynsyrtok eh ha ka leit ka wan ki paidbah, u la bynrap.