Byrthen ka MPUF ia ka jingkynnoh, u bar jylla

Shillong, 13 Iaiong:
Ka  Meghalaya People United Front (MPUF) ka la ong ba ka jingkynnoh jong uwei u bar jylla ia ka kynhun  ba ka dawa pisa haduh T. 1,20,000 ka dei kaba bakla bad shu lamler khlem kano kano ka jingshisha.
 Haba kren hynne ka sngi sha ki nongthoh khubor u President ka MPUF u Dapoiwanmi Laloo u la ong ba uwei  u bar jylla uba buh dukan mar bam mardih, ka seng ka la phah ia u ba un wan ban ia kynduh ia ka seng ha ka 6 tarik 2015 hadien ba ki la lap ba u die ia ki tiar mar bam mar dih ba la sniew .
Ka  MPUF ka la pan na u ia ka trading license ka labour license bad ka wholesale license hynrei u pyni tang ia ka trading license kata ruh kaba la kut por.
Une u bar jylla u la pan por ba un wanrah ban pyni ia ki kot ki ba dang biang por. Hynrei une u bar jylla um shym la wanrah satia ia kita ki kot ki sla haduh mynta.
Halor kane ka MPUF ha ka 9 tarik Iaiong ka la leit ban ujor ejahar pyrshah ia une u bar jylla ha Lad Rymbai police station namar ba u die ia ki tiar kiba la sniew bad ba um don ia ka Trading licence kaba biang. 
Une u bar jylla la tip kyrteng kum u Ali Iman na Muzaffpur, Bihar bad mynta u shong u sah ha Ladrymbai  East Jaintia Hills.  
Ha ka 10 tarik u Iaiong une u bar jylla hapoh  ka  jingialam jong ki katto katne ki briew ki bym, tip ki la leit ban ujor ejahar pyrshah ia ka MPUF da kaba kynnoh ba kane ka kynhun  ka la dawa pisa na u T. 1, 20,000 bad kane baroh kam dei kaba shisha, laong u bah Laloo.
Ka MPUF ka la kyntu ia ki nongthoh khubor ba kim dei ban pynmih khubor bakla kumba la jia la mih ha ka 11 tarik Iaiong hynrei kidei ban wad shwa ia ka jingshisha , la ong u bah laloo.
U la bah Laloo ba utei u bar jylla u la ujor ejahar hynrei la ia mynjur baroh ar liang ban ia weng noh ia ka ejahar ha ka 10 tarik Iaiong ha Ladrymbai Beat House hynrei namar bym don u OC ki la pyndep ha ka 11 tarik Iaiong.
                U Bah Laloo u la ong ba ka seng ka la ailad ia utei u bar jylla ban pynbeit ia ka jingbakla da kaba ailad ba un pyndep haduh ka 8 tarik Iaiong hynrei um shym la leh bad na kata ka daw, ka seng ka ujor ejahar kylla ia u.
                Ka seng ka la maham ruh ba lada ka lap ne shem ba pynbudnam ia ka seng, kan sa ai jingsneng katkum ka ain.
                Ka MPUF ka la thoh ruh sha u EM ka District Council ban leit pynlong ia ka jingjurip bad kynra ia ki bar jylla ba khaii beain khlem trading license ha Ladrymbai .