Lada ngin pynsngew ia ki jingshisha da kaba pyni dur ne kyrteng ha kotkhubor, thikna ba ngin sa shah thwet beit ha ki Pulit Assam

Nongpoh: Ha ka jingiakren bad u Nongthohkhubor, ki la don riew paidbah kiba sah ha ki katto katne tylli ki shnong kiba don ha Block-2 Ri Bhoi District, kiba la pynpaw ba lada kin kren ia kano kano ka jingshisha halor ka jingshah nionbein jong ki ha ki Pulit Assam, kaba mut ba kim ioh shuh ban shongsuk shongsain ha iing, ha kaba kin hap ban ngat ha ka jingshah thwet kaba jur ha ki Pulit Assam.

“Nga la mad ia kiba bun ki jingshah pynshitom ha ki Pulit Assam, kata ka la jia namar ba nga la kum iathuh ia ka jingshisha ha ka por ba nga kren ne iathuh ia kano kano ka jingshisha sha ki briew na Meghalaya, kiba ju poi teng teng sha shnong jong ngi (Block-2).

Ka long shisha kaba isynei eh ban iakren bad uta u Rangbah, uba la ong ba u kwah eh ban kren sha ki lad Pathaikhubor la ka long ha ki Print ne Electronic Media, hynrei um nud pat ban kren ne ban iathuh ia ka jingshisha, namar lada un iathuh ia ka jingshisha ha ki lah pathaikhubor, da kaba pyni ia ka dur jong u, kaba mut ym slem ba un sa shah khot ha ki Pulit Assam, ki ban sa kylli ia ki jingkylli kiba Laiphewjait bad nalorkata ki sa byrngem ruh ban shoh ban dat ha ban da jem.

U la don uwei u riew rangbah, uba sah ha kawei ka shnong kaba don ha khappud, uba la iathuh ba ka nongrim kaba la pynlong ia ki ba kim nud shuh ban kren ia ki jingshisha, ka dei hadien ba ki la mad ia shibun ki jingshah khot hajir ha ki Pulit Assam bad kiba la mad ruh ia ka jingshah set bun bun sngi ha iing byndi, kata ka la jia tang namar ba ki la shah pynpaw paidbah ia ka kyrteng jong ki ha ki Kotkhubor, namar shisien uno uno u briew uba la paw kyrteng ha ryngkat ka dur bad uba kren pyrshah ia ki kam thombor ki Pulit Assam, kaba mut un sa shah thwet beit ha ki pulit Assam.

Na kaei kaba la lap da u Nongthohkhubor, ki nongialam shnong ne ki riew paidbah kiba sah ha katei ka thain, kim da sngewkmen eh haba ki Nongmihkhmat na kino kino ki Party ne Sengbhalang ruh kumjuh ban kin poi sha katei ka jaka, namar la ka long ia ki Politishan ne Sengbhalang ruh, kin shu kren beit tang ha kano kano ka jingialang kaba long ha katei ka thain, lait nangta pat ki la leit sha la ka jong ka jaka sah, katba ki briew kiba shong ba sah ha katei ka jaka, ki hap ban shong beit ha katei ka jaka bad lada mih kano kano ka jingjia kaba ym sngewtynnad, kaba mut ka jingkynnoh kan leit beit sha kito ki Khasi kiba don ia ka mynsiem ban rung sha Meghalaya.