Shillong: Dang shen ka Sorkar Jylla ka la pynbna ba u Amit Shah u ba dei u Myntri ki kam pohiing ka Ri un wan ban iuhkjat biang sha kane ka Nongbah Shillong ha ka 17 tarik u bnai Naitung 2021, ha kaba na ka liang jong ki Myntri ka Sorkar Jylla kim pat tikna satia la ki sengbhalang jong ka Jylla kin ioh ne em ka lad ban iakynduh pyrshah bad u Amit Shah ban iakren halor ka mat Inner Liner Permit(ILP) bad kiwei kiwei ki mat.
Ka jingangnud jong ki sengbhalang ka jylla ban iakynduh markhmat bad u Amit Shah ka la neh la slem bah ha kaba une u Myntri u la iai kular na kawei ka por sha kawei ka por ban wan hi dalade ban iathir iatai sani bha halor kiba bun mat jong ka Jaitbynriew hynrei kine ki jingkular jong une u Myntri ki shu ia sahkut sah kumjuh haduh kine ki sngi ba mynta.
Haba kren sha ki lad pathai khubor, mynta ka sngi ka 9 tarik u bnai Naitung 2021, u Myntri Rangbah ka Jylla, u Conrad K Sangma, u la ong ba ia mynta hi katei ka jingwan jong u Amit Shah ka dei tang halor ki prokram kiba dei ban don bad un don hange tang kumba 2 sngi eiei bad un sah ha Nongbah Shillong shi miet.
U Conrad u la iathuh ruh ba u Amit Shah un shong ruh ia ka jingialang jong ka North Eastern Space Applications Centre (NESAC) bad un plie pyrda ruh ia kumba ar ne lai tylli ki projek kiba don ha East Khasi Hills. Shuh shuh u Amit Shah ruh un shong ka jingialang bad ki Myntri Rangbah jong ka shatei lam mihngi ka Northeast, ha kaba kin don lang ki Chief Secretary bad ki DGP. Ha kajuh ka por u Amit Shah un leit ban hiar ruh sha Sohra ha kaba u hap ban plie ia kawei ka projek bad ha kajuh ka por un sdang ruh ia kawei ka projek ban thung dieng khnang ban pynbun ia ka jingthung dieng ha ki thaiñ Sohra.
U Myntri Rangbah u la iathuh ba u la ioh ban pdiang ia ki jingkyrpad na ki sengbhalang kiba pher pher kiba kwah ban iakynduh ia u Amit Shah bad na ka liang jong ka Sorkar Jylla ka la buh ia katei ka jingkyrpad na ka bynta kine ki sengbhalang ba kin ioh ia ka por bad une u Myntri, hynrei ia mynta hi ym pat ioh satia ia ka jubab, hynrei na ka liang jong u Conrad u khmih lynti kaba bha ba u Amit Shah un pyllait por khnang ban kynduh ia kitei sengbhalang. U Conrad u la ong ruh ba kum u Myntri Rangbah ruh un ia iakren iathir halor ki mat kiba bun bad une u Myntri ki kam pohiing ka Ri.
Phi don ban ong eiei?