Ud ki nongniah bos “Umphniang kaba rem, bai tiar kaba rem, kot kali kaba rem” Por bam khana, te ia muja da ki jingrwai U UN Sun

Shillong:Ha kum kane ka por baroh ki paidbah ka jylla kiba im jakpoh da kaba shu kamai kajih da kaba ki trei ki kam lajong ki da mad shisha ia kata ka jingeh namar ka jingkhangdam kaba ar ha ka jylla hadien ba ka khlam Covid-19 ka la wan lynshop tyngeh ha kane ka kynti kaba ar bad ki nongniah City Bus ki dei kiwei napdeng kine kiba la pynpaw ia kata ka jingeh kaba khraw.

Kitei ki nongniah City Bus ki la iathuh ba wat la ki ioh ban mih man ka sngi ban kamai naduh ba la pynjynsur ia ka jingkhangdam ha ka jylla, hynrei ki paidbah nongshong bos pade kim don satia bad la ioh ban thep ruh tang da ki mar ki mata suda.

Ki la iathuh ba ha ka por ba don ka jingkhangdam bad bym shah satia ban mih kamai sha surok ki la shu im ban ia bam ia dih da ki jingrep jingriang lajong. Ki la bynrap shuh shuh ba katei ka kam niah bus ka la long ka kam kaba naduh ba ki dang khynnah haduh ba kin don ioh lok ki la im ban kamai da katei ka kam.

Kitei ki nongniah bos ki la iathuh ruh ba ha ka por ba dang iaid beit iaid ryntih ka pyrthei ka jingkamai jong ki ruh ka bit ka biang bha ban ia kaba ianujor mynta ki por bad tang shu la dei ha ki por tlang lei lei ka mut ka jingiohkamai ka lah kham biang shuh shuh namar ba ki briew ki ju sngewtynnad bha ban wai ia kine ki bos dieng haba ki leh bam khana shane shatei bad ha ka por ba kine ki nongleit bam khana ki leit bam khana ki ju sngewtynnad bha ban ia shad ia kmen ha poh kitei ki bos da ka jingrwai jong u UN Sunn.

Shuh shuh kitei ki nongniah bos ki la iathuh ruh ba ha ka por ba dang biang ka kamai ki ioh ban dih da u sikret ne u biri, hynrei naduh ba long ka pyrthei kumne pat ki hap ban dih da u makyllaiñ namar bym ioh kamai kajih.
Na ka liang jong kitei ki nongniah bos ki la buh ka jingkyrpad na ki bor kiba halor ba kin sngewbha ban pyllait noh shisyndon ban ia mih kamai namar ba kine ki nongniah bos ki buh ia kitei ki bos ruh ban ioh jingmyntoi ban pynmih ia ka bai kamai ym ban shu long sah kumne ban duh ka kamai ka kajih halor ka bai umphniang ruh kaba rem,ka tiar kali ruh kaba rem, hap sa ban siew sa ka bai kot kali.