Dawa ki kynhun nonghikai ba dei ban thung noh da ka Professor kynthei, kaba dei ka riewlum kum ka VC jong ka NEHU

Shillong: Ki nonghikai kiba don hapoh ka shatri jong ka NEHUTA bad ka MeTTA-NEHU ki la dawa na ka Sorkar Pdeng ba ka dei ban pyrkhat ban thung noh da ka Professor kynthei kaba dei ka riewlum kum ka Vice Chancellor(VC) jong ka North Eastern Hill University.

“Ngi dawa ba dei ban thung noh mar mar ia ka professor kynthei kaba dei ka trai riewlum kaba la don ka kyrdan kum ka VC jong ka NEHU, khlem da pynslem shuh na ka bynta ka bit ka biang jong ka university bad ka imlang ka sahlang”, la ong u President ka NEHUTA,u Prof XP Mao bad u President ka MeTTA-NEHU, u Dr Lakhon Kma ha kajuh ka shithi ba la pyllait ha ka sngi Palei.

Shuh shuh ki la ong, “Ha kajuh ka por, ngi dei ban kynmaw ruh ia ka jinglong kordor ka jylla Meghalaya kaba bud ia ka tynrai ban ai jait sha ka kynthei bad ka jingdonkam ban pynkhiah ia ka NEHU hadien ba kumba hynriew snem eiei ba khlem don kano kano ka jingioh mad ia ka jinglong shakhmat jong ka, ngi kyrpad ia u Myntri jong ka Sorkar Pdeng bad ia u Myntri bathymmai jong ka tnad pule puthi ba kin sngewbha ban ia mynjur ban thung noh da ka Porfessor kynthei kaba dei ka riewlum, ka ban mynjur ia ka jingwad ban jied committee khnang ba ka NEHU kan ioh VC, ba ym tang ba ka nang ban ialam hynrei ban wanrah ruh ia ka jingpynkhiah ka ban weng ia ki jingpyniaid kiba kynrum kynram jong ka Unibersiti bad ban ialam ruh sha ka lynti kaba shakhmat bad ha baroh ki liang jong ka kam pynroi”.
Ka Meghalaya Tribals Teachers’ Association (MeTTA-NEHU) bad ka North Eastern Hill University Teachers’ Association (NEHUTA), ki la ong ba ka jingpynslem ban thung Vice Chancellor jong ka NEHU ka la ktah shikat dei eh ia ka unibersiti.

Ki la ong ruh, “Ngin iai ban biang ba ka jingpep jong u Vice Chancellor bathymmai, ka pynsah kut beit sbak ia ka jinglong ba shakhmat jong ka unibersiti, ha kaba ka NEHU ka la mad ruh ia kata ka jingdkoh ka jingtreikam, ka jingleh bha ha ka pule puthi ruh ka la hiar bad ka la mad ruh ia ka jingduna ha kaba iadei bad ka pisa pilaiñ ha kine ki san snem kaba la pynhiar ia ka jingdon bad ka kyrdan jong ka Unibersiti”.