Nalor ka khlam COVID-19, sa ka sniew surok ha Ri Bhoi Mihngi

Nongpoh:Ka jingsniew kaba palat pud ka surok na Bhoirymbong ter ter sha ki thain Nongthymmai bad Kyrdem, nangta na Kyrdem sha Khyndewso bad Nongthymmai sha Mawbsein, ka la wanrah jingeh shikatdei eh ia ki paidbah kiba sah ha kiba bun phew tylli ki shnong kiba don ha katei ka thain.

Haba iadei bad ka jingsniew ka surok ha katei ka thain, ka Ri Bhoi Student Union, lyngba u Bah Amberlight Masharing, Working President ka Seng, ki la dawa na ka sorkar jylla bad khamtam eh ia u Myntri ka tnat PWD, ba ki dei ban shimkhia ha ka ban pynbha noh ia katei ka surok, la ka long ban maramot ne ban shna pynbha, khnang ba kan pynsuk ia ki paidbah kiba pyndonkam ia katei ka surok.

U Bah Amberlight Masharing, u la pynrem jur ia ka sorkar jylla bad kumjuh ruh ia u Myntri ka Tnat PWD, namar ka jingbym phaikhmat ia ka jingeh ki paidbah bad khamtam eh sha ki surok Nongkyndong, kaba la wanrah ruh ia ka jingeh kaba khraw ia ki paidbah ha ka iaid ka ieng.

Namarkata, utei u nongialam ka RBSU, u la kyntu ia ka sorkar bad khamtam eh ia ka tnat PWD ba ka dei ban phaikkhmat halor ka jingsniew kaba palat pud katei ka surok, namar ha kaba kum kane ka por ba ki paidbah, nalor ba ki mad jingeh ha ka jingshah ktah ha ka khlam COVID-19, sa kata sniew ki surok bad kaba la pynsyrtok eh ia ki paidbah ba kin iaid ha ki surok ba jot ba pra.